اسلام آباد ہائی کورٹ : عمران خان کا ایکس اکاؤنٹ بند کرنے کی درخواست سماعت کےلیے مقرر

اسلام آباد ہائی کورٹ نے عمران خان کا ایکس (سابق ٹوئٹر) اکاؤنٹ بند کرنے سے متعلق درخواست 4 نومبر کو سماعت کےلیے مقرر کر دی ہے۔

اسلام آباد ہائی کورٹ کے رجسٹرار آفس نے کاز لسٹ جاری کردی ہے، جس کے مطابق جسٹس ارباب محمد طاہر اس مقدمے کی سماعت کریں گے۔ یہ درخواست شہری غلام مرتضیٰ نے اپنے وکیل بیرسٹر ظفراللہ کے توسط سے دائر کی ہے،جس میں دورانِ قید عمران خان کے ایکس اکاؤنٹ سے مبینہ طور پر اشتعال انگیز اور انتشار پھیلانے والی پوسٹس ہٹانے اور مزید پھیلاؤ سے روکنے کی استدعا کی گئی ہے۔

درخواست گزار نے مؤقف اپنایا ہے کہ عمران خان کے غیرقانونی اور بدنیتی پر مبنی ٹویٹس ملک میں انتشار کا باعث بن رہے ہیں، لہٰذا انہیں ہٹایا اور اکاؤنٹ کو بلاک کیا جائے۔ عدالت نے عمران خان کو نوٹس جاری کرتے ہوئے جواب طلب کر رکھا ہے جبکہ نیشنل سائبر کرائم ایجنسی، سپرنٹنڈنٹ جیل اور دیگر فریقین سے بھی وضاحت مانگی گئی ہے۔

ذرائع کے مطابق یکم اکتوبر کو نیشنل سائبر کرائم انویسٹی گیشن ایجنسی (این سی سی آئی اے) نے عمران خان کو 21 نکاتی سوالنامہ فراہم کیا تھا،جس کے جوابات کی روشنی میں مزید تفتیش کی جانی ہے۔تفتیشی ٹیم دو بار عمران خان سے ملاقات کرچکی ہے،تاہم جیل میں انہوں نے تعاون نہیں کیا۔

این سی سی آئی اے کےمطابق تفتیش کے دوران پوچھا گیاکہ جیل میں ہونے کے باوجود عمران خان کا ایکس اکاؤنٹ فعال کیسے ہے؟ یہ اکاؤنٹ کون اور کہاں سے آپریٹ کرتا ہے؟ اور کیا اکاؤنٹ سے کی جانے والی پوسٹس ان کی مرضی سے ہوتی ہیں؟