ایران جانے کی کوشش کرنیوالے 14 افغانیوں کی لاشیں صحرا سے برآمد

جنوب مغربی افغانستان کے صحرا میں ایران جانے کی کوشش کرنے والے 14 افغان باشندوں کی لاشیں برآمد ہوئی ہیں۔

حکام کے مطابق کئی ہفتوں سے ان کی تلاش جاری تھی، یہ افراد گاڑی کے ذریعے ایران جانے کے لیے نکلے تھے تاہم راستے میں گاڑی خراب ہونے کے بعد انہوں نے پیدل سفرجاری رکھا۔

رپورٹ کے مطابق صوبہ نیمروز میں ان افغان باشندوں کی تلاش اس وقت شروع ہوئی جب ان کی گاڑی کا ڈرائیور شدید پیاس اور تھکن کی حالت میں ایک گاؤں پہنچا اور مدد طلب کی۔

ابتدائی طور پر 5 لاشیں ملنے کے بعد حکام نے مزید 14 افراد کی تلاش شروع کی تھی جو پیدل سفر جاری رکھے ہوئے تھے۔

نیمروز افغانستان کے گرم ترین اور خشک ترین علاقوں میں شمار ہوتا ہے جہاں اس وقت درجہ حرارت تقریباً 45 ڈگری سینٹی گریڈ کے قریب رہتا ہے۔

مقامی ہسپتال کے ذرائع نے بتایا کہ ہفتے کے روز 14 لاشیں ریت میں دبی ہوئی ملیں۔

دوسری جانب افغان حکام نے انسانی سمگلنگ کے خلاف کارروائی جاری رکھنے کے عزم کا اظہار کیا ہے، جبکہ وزارتِ داخلہ کے ترجمان عبدالمتین قانی نے قومی نشریاتی ادارے کو جاری بیان میں کہا کہ حکام ’انسانی سمگلنگ کے خلاف اپنی کارروائیاں بھرپور انداز میں جاری رکھے ہوئے ہیں‘۔