مردم شماری ڈیٹا استعمال کرتے ہوئے سیلابی نقصانات کا تخمینہ لگانے کا فیصلہ
حکومت نے فیصلہ کیا ہے کہ سیلاب سے ہونے والے نقصانات کا تخمینہ لگانے کے لیے مردم شماری اور زراعت شماری کا ڈیٹا استعمال کیا جائے گا۔
ذرائع کے مطابق وفاقی وزیر منصوبہ بندی و ترقی احسن اقبال نے ادارہ شماریات کو ہدایت دی ہے کہ ملک بھر میں حالیہ سیلاب سے متاثرہ علاقوں کے نقصانات کا جامع جائزہ لیا جائے۔
حتمی تخمینے کے لیے مردم شماری اور زراعت شماری کے ڈیٹا کو بنیاد بنایا جائے گا، جب کہ انفرا اسٹرکچر اور کاروباری سرگرمیوں پر پڑنے والے اثرات کا اندازہ لگانے کے لیے اکنامک شماری سے بھی مدد لی جائے گی۔
ذرائع نے بتایا کہ زراعت شماری کا ڈیٹا فصلوں اور لائیو اسٹاک کو پہنچنے والے نقصان کے تجزیے میں معاون ہوگا، جب کہ جدید سافٹ ویئر اور دستیاب معلومات کی مدد سے سیلابی نقصانات کا سروے مکمل کیا جائے گا۔
حکام کے مطابق حالیہ اکنامک شماری کے دوران ملک بھر کی عمارتوں کو جیو ٹیگ کیا گیا تھا، جس کے ذریعے اضلاع، بلاکس اور گاؤں کی سطح پر نقصانات کا تعین ممکن ہوگا۔ اس عمل سے بزنس سینٹرز، تعلیمی ادارے، مساجد اور دیگر عمارتوں کو پہنچنے والے نقصانات کا بھی درست اندازہ لگایا جا سکے گا۔
