جمہوریہ کانگو میں دو کشتی حادثات، 193 افراد جاں بحق، 150 سے زائد لاپتہ
افریقی ملک جمہوریہ کانگو میں دو مختلف کشتیوں کو پیش آنے والے حادثات میں ہلاکتوں کی تعداد 193 تک پہنچ گئی ہے، جب کہ 150 سے زائد افراد اب بھی لاپتہ ہیں۔
غیر ملکی میڈیا کے مطابق یہ واقعات 10 اور 11 ستمبر کو صوبہ ایکواٹور سے تقریباً 150 کلومیٹر کے فاصلے پر پیش آئے۔
11 ستمبر کو دریائے کانگو کے کنارے کولیلا کے مقام پر ایک کشتی میں 500 افراد سوار تھے کہ اچانک آگ بھڑک اٹھی، جس کے بعد کشتی الٹ گئی۔ وزارتِ انسانی امور کے مطابق اس حادثے میں 107 افراد جان سے گئے، 200 سے زائد کو زندہ بچا لیا گیا، جب کہ لگ بھگ 150 افراد اب بھی لاپتہ ہیں اور ان کی تلاش جاری ہے۔
اس سے ایک روز قبل 10 ستمبر کو صوبہ ایکواٹور کے علاقے بسنکسو میں ایک موٹرائزڈ کشتی الٹنے سے کم از کم 86 افراد ہلاک ہوئے، جن میں بڑی تعداد طلبہ کی تھی۔ حکام کے مطابق اس حادثے کی وجوہات تاحال سامنے نہیں آئیں، تاہم اس میں بھی کئی افراد لاپتہ ہوئے جن کی تلاش جاری ہے۔
