غزہ امن منصوبہ: پاکستان سمیت مسلم ممالک کا حماس کے مثبت ردعمل کا خیر مقدم

پاکستان سمیت 8 مسلم ممالک نے غزہ امن منصوبے پر حماس کی جانب سے امریکی صدر ڈونلڈ ٹرمپ کی تجویز پر مثبت رد عمل کا خیر مقدم کیا ہے۔

دفتر خارجہ کے مطابق پاکستان، سعودی عرب، متحدہ عرب امارات، ترکیہ، اردن، انڈونیشیا، قطر اور مصر کے وزرائے خارجہ کی جانب سے مشترکہ بیان میں امریکی صدر ڈونلڈ ٹرمپ کی غزہ جنگ کے خاتمے سے متعلق تجویز پر حماس کے مثبت ردعمل کا خیر مقدم کیاگیا ہے۔

ترجمان دفتر خارجہ کا کہنا ہےکہ مشترکہ بیان میں حماس کے یرغمالیوں کی رہائی اور عملدرآمد کےطریقہ کار پر مذاکرات کے آغاز کے فیصلے کو بھی سراہاگیا اور امریکی صدر ٹرمپ کی اسرائیل سے فوری بمباری روکنے کے مطالبےکا خیرمقدم کیا گیا۔

ترجمان کا کہنا ہے کہ متعلقہ ممالک کے وزرائے خارجہ نے خطے میں قیام امن کےلیے امریکی صدر کی کوششوں کی تعریف کی۔

مشترکہ بیان کےمطابق یہ پیشرفتیں جامع، پائیدار جنگ بندی کےلیے حقیقی موقع فراہم کرتی ہیں۔وزرائے خارجہ نے غزہ میں انسانی بحران کے خاتمے، فوری امداد کی فراہمی کی ضرورت پر زور دیا اور مشترکہ بیان میں حماس کی جانب سے غزہ کا انتظام ماہر ٹیکنوکریٹس کی عبوری فلسطینی انتظامی کمیٹی کے سپرد کرنے کی پیشکش کا خیر مقدم کیا۔

ترجمان دفتر خارجہ کا کہنا ہےکہ وزرائے خارجہ نے تجویز پر عملدرآمد کا طریقہ کار طے کرنے کےلیے فوری مذاکرات کے آغاز کی ضرورت پر زور دیتےہوئے کہا کہ جنگ کے فوری خاتمے،انسانی امداد کی فراہمی اور فلسطینی عوام کے عدم انخلا کو یقینی بنایا جائے۔کسی بھی ایسے اقدام سے گریز کیاجائے جو فلسطینی شہریوں کے تحفظ کو خطرے میں ڈالے،تمام ممالک نے فلسطینی اتھارٹی کی غزہ واپسی،غزہ اور مغربی کنارے کے اتحاد پر زور دیا۔

ترجمان دفتر خارجہ کے مطابق وزرائے خارجہ نے تمام فریقوں کے تحفظ کےلیے سکیورٹی مکینزم اور اسرائیلی افواج کےمکمل انخلا اور غزہ کی تعمیر نو کی ضرورت پر زور دیا۔وزرائے خارجہ نے دو ریاستی حل کی بنیاد پر منصفانہ امن کے قیام کی حمایت کی۔