پنجاب حکومت سندھ حکومت کے خلاف مہم چلا رہی ہے : شرجیل میمن

سندھ کے سینئر وزیر شرجیل انعام میمن کا کہنا ہے کہ پنجاب حکومت سندھ حکومت کے خلاف مہم چلا رہی ہے، پیپلز پارٹی کو کوئی کہے ہم آپ کی انگلی توڑ دیں گےتو کیا ہم ڈر جائیں گے، ہم نہیں ڈریں گے۔

کراچی میں پریس کانفرنس کرتے ہوئے سندھ کے سینئر وزیر شرجیل میمن کا کہنا تھا کہ پنجاب حکومت نشانہ پیپلز پارٹی کو بنا رہی ہے لیکن ان کا اصل ہدف وفاق ہے، ہماری آڑ میں وزیر اعظم کو نشانہ بنایا جارہا ہے، پنجاب حکومت کی وفاق حکومت کے خلاف ہونے والی سازش کو کامیاب ہونے نہیں دیں گے۔

سینئر رہنما پیپلز پارٹی شرجیل میمن نے کہا کہ کچھ دنوں سے پنجاب حکومت کی جانب سے پیپلز پارٹی کےخلاف مہم چلائی جارہی ہے، پنجاب حکومت کی طرف سے مسلسل تنقید کا مقصد سمجھ سے باہر ہے،وزیر اعلیٰ پنجاب کا سکرپٹ رائٹر ان کو غلط راہ پر لے جارہا ہے، سکرپٹ رائٹر نے انہیں کہا اب پنجاب کارڈ کھیلو،کارکردگی پر تنقید کریں، اختلاف ہوسکتے ہیں لیکن نفرت نہ پھیلائیں۔

شرجیل انعام میمن نے کہا کہ ہم وفاقی حکومت کا حصہ نہیں ہیں،لیکن ایشوز پر حکومت کو سپورٹ کرتےہیں، ہم تو آپ سے بات نہیں کررہے، وفاق سے کررہے ہیں۔

صوبائی وزیر نے کہاکہ پیپلز پارٹی کو کوئی کہے ہم آپ کی انگلی توڑ دیں گے، آپ کو لگتا ہے ہم ڈر جائیں گے؟ کیا کوڑے اور پھانسیاں جھیلنے والے گیدڑ بھپکیوں سے ڈر جائیں گے ؟ وفاقی وزیر قانون نے قومی اسمبلی کے فلور پر وزیر اعلیٰ پنجاب کے بیان پر معافی مانگی،ہم آپ سے لڑنا نہیں چاہتے،آپ زبردستی ہمیں میدان میں نہ اتاریں۔

انہوں نے کہا کہ میرا پانی میری مرضی جیسی باتیں کوئی آئین کو ماننےوالا نہیں کرسکتا،میں بھی میری بجلی میری گیس،میرا کوئلہ میری مرضی کہہ سکتا ہوں لیکن نہیں کہوں گا۔

پیپلز پارٹی کی پنجاب کے معاملات میں مداخلت غیر آئینی ہے : عظمیٰ بخاری

شرجیل میمن کا کہنا تھاکہ ہم نے 100 کام کیے اور ہم دکھاسکتے ہیں،ہم نے ای وی بس شروع کی،ہمارا کوئی مقابلہ نہیں ہے۔