عمران خان نے ملک گیر احتجاجی تحریک کا اعلان کردیا
پاکستان تحریک انصاف کے سینئررہنما بیرسٹر علی ظفر نے کہا ہے کہ عمران خان نے حکومت کے خلاف احتجاجی تحریک شروع کرنے کا اعلان کردیا ہے۔
اڈیالہ جیل میں عمران خان سے ملاقات کے بعد میڈیا سے گفتگو کرتے ہوئے انہوں نے کہاکہ ہماری تحریک ملک گیر ہوگی، اس کا مرکز اسلام آباد نہیں ہوگا۔عمران خان نے واضح کیا ہے کہ سڑکوں پر آنے کے سوا ہمارے پاس کوئی چارہ نہیں، کیوں کہ ہمیں دیوار سے لگایا گیا ہے، میں جیل میں بیٹھ کر ملک بھر میں ہونے والے احتجاج کو لیڈ کروں گا۔عمران خان نے مجھے احتجاجی تحریک کا پلان بنا کر دینے کی ہدایت کی ہے اور کہا ہے کہ وہ اس حوالے سے تمام ہدایات جیل سے دیں گے۔
بیرسٹرعلی ظفرنےکہا کہ اب میں عمران خان سے آئندہ ہونے والی ملاقات میں احتجاجی تحریک کا پلان پیش کروں گا، میں اس حوالے سے وکلا اور پارٹی قیادت سے مشاورت کروں گا۔ عمران خان تحریک کو نتیجہ خیز بنانے کے لیے سنجیدہ ہیں، اس بار جو تحریک چلے گی وہ پہلے کبھی نہیں چلی ہوگی۔ احتجاجی تحریکوں کے دوران رکاوٹوں کا سامنا کرنا پڑتا ہے، لیکن ہمیں طریقے آتے ہیں۔
بیرسٹر علی ظفر نے کہاکہ عمران خان نے پارٹی لیڈر شپ پر اعتماد کا اظہار کرتے ہوئے کہا ہے کہ ہمیں عدلیہ اور ایگزیکٹو سے کوئی ریلیف نہیں مل رہا، اس لیے احتجاج کے علاوہ کوئی آپشن نہیں، میں احتجاجی تحریک کو خود لیڈ کروں گا۔
