جی ایچ کیو حملہ کیس میں عمران خان کی بریت کی درخواست خارج

انسداد دہشتگری عدالت راولپنڈی نے 9 مئی 2023 کوجی ایچ کیو حملہ کیس میں پاکستان تحریک انصاف کے بانی عمران خان کی بریت کی درخواست خارج کردی۔
انسداد دہشتگری کی عدالت نے جی ایچ کیو حملہ کیس میں عمران خان سمیت دیگر دو ملزمان کی درخواست بریت مسترد کر دی، فیصلہ انسداد دہشت گردی عدالت کے جج امجد علی شاہ نے سنایا۔
یاد رہے کہ بانی پی ٹی آئی نے آرٹیکل 265 کےتحت بریت کی درخواست دائر کی تھی۔
پراسیکیوٹر نے دوران سماعت دلائل دیے ہ ملزمان کے خلاف استغاثہ کے پاس کافی شواہد ہیں، ملزمان پر فرد جرم عائد ہو چکی، استغاثہ کےگواہان شہادت ریکارڈ کروا رہے ہیں۔انہوں نے دلائل میں کہا کہ 12 گواہان کے بیانات ریکارڈ ہوچکے ہیں، ٹرائل کے دوران بریت کی درخواست نہیں بنتی۔عدالت نے دلائل سننے کے بعد ملزم کی بریت کی درخواستیں مسترد کر دی۔اس سے قبل انسداد دہشتگردی کی عدالت راولپنڈی نے دو پی ٹی آئی رہنماؤں اجمل صابر اورسہیل عرفان عباسی کی درخواست بریت خارج کی تھی۔
25 جنوری 2025 کو ہونے والی گزشتہ سماعت پر راولپنڈی کی اڈیالہ جیل میں عمران خان سمیت دیگر ملزمان کے خلاف 9 مئی کو جی ایچ کیو حملہ کیس میں مزید3 گواہان کا بیان ریکارڈ کیا گیا تھا۔
خیال رہے کہ 20 دسمبر 2023 کو انسداد دہشتگردی عدالت راولپنڈی نے 9 مئی 2023 کو جنرل ہیڈ کوارٹرز (جی ایچ کیو) حملہ کیس میں سابق وزراعظم عمران خان، سابق وزیر خارجہ شاہ محمود قریشی سمیت پاکستان تحریک انصاف کے دیگر رہنماؤں کی فرد جرم عائد کیے جانے کیخلاف درخواستیں خارج کردی تھیں۔