اقوام متحدہ چارٹر آرٹیکل 51 کے تحت ایران کے حقِ دفاع کی مکمل حمایت کرتے ہیں ، اسحٰق ڈار

نائب وزیراعظم پاکستان اسحٰق ڈار نے ایران پر اسرائیلی حملوں کو غیر قانونی قراردے دیا اور کہا کہ پاکستان، ایران کے دفاع کے حق کی مکمل حمایت کرتا ہے۔

او آئی سی اجلاس میں خطاب کرتے ہوئے نائب وزیراعظم و وزیر خارجہ اسحاق ڈار نے اس بات کا اعادہ کیا ہے کہ پاکستان اقوام متحدہ کے چارٹر کے آرٹیکل 51 کے تحت ایران کے جائز حقِ دفاع کی مکمل طور پر حمایت کرتا ہے، خاص طور پر اسرائیل کی جانب سے کی گئی بلااشتعال اور کھلی جارحیت کے تناظر میں۔

نائب وزیر اعظم  نے واضح کیا کہ اسرائیل نے ایران پر حملے اُس وقت کیے جب بین الاقوامی جوہری توانائی ایجنسی (آئی اے ای اے) ایران میں اپنی نگرانی اور تصدیقی سرگرمیاں انجام دے رہی تھی اور ان حملوں کے ذریعے اسرائیل نے بین الاقوامی قانون، آئی اے ای اے کے آئین اور متعدد قراردادوں کی خلاف ورزی کی۔

امریکی حملے اسرائیلی حملوں کا تسلسل ہیں ، پاکستان کی ایرانی تنصیبات پر حملوں کی شدید مذمت

اسحٰق ڈار نے خبردار کیا کہ ان حملوں کے خطرناک نتائج ہو سکتے ہیں اور پورے خطے بلکہ دنیا بھر کی آبادیوں کے لیے شدید خطرات لاحق ہو سکتے  ہیں۔

نائب وزیراعظم نےکہا کہ اسرائیل کی جارحیت ایک خطرناک کشیدگی کی نمائندگی کرتی ہےاوریہ نہ صرف خطےبلکہ پوری دنیا کےامن و استحکام کے لیے ایک سنگین خطرہ ہے۔

خطاب میں نائب وزیر اعظم و وزیر خارجہ اسحٰق ڈار  نے کہا کہ ہم  امید کرتے ہیں  کہ آج کا اجلاس نہ صرف ایران کے ساتھ یکجہتی کا اظہار کرے گا بلکہ یہ واضح پیغام بھی دے گا کہ اسرائیل کو جوابدہ ٹھہرایا جانا چاہیے اور اس کی لاپرواہ جارحیت کو پورے خطے کے امن کو خطرے میں ڈالنے کی اجازت نہیں دی  جائے گی ۔