اسلام آباد ہائی کورٹ کا عمران خان سے وکیل سلمان اکرم راجا کی ملاقات کا حکم

اسلام آباد ہائی کورٹ نے بانی پاکستان تحریک انصاف (پی ٹی آئی) عمران خان کے ’ایکس‘ اکاؤنٹ پر ریاست مخالف مواد شیئر کرنے کے کیس میں ہدایت جاری کی ہے کہ جیل حکام آج ہی وکیل سلمان اکرم راجا کی عمران خان سے ملاقات یقینی بنائیں۔

 عدالت نے ڈپٹی اٹارنی جنرل اور اسٹیٹ کونسل کو بھی ہدایت کی کہ وہ فون کال کے ذریعے جیل حکام کو ملاقات کے انتظامات کے بارے میں آگاہ کریں۔

کیس کی سماعت جسٹس ارباب محمد طاہر نے کی۔ سماعت کے دوران عمران خان کے وکیل سلمان اکرم راجا نے مؤقف اختیار کیا کہ انہیں اپنے مؤکل سے رابطہ حاصل نہیں، اس لیے وہ بغیر ہدایات جواب جمع نہیں کرا سکتے۔

جسٹس ارباب محمد طاہر نے ریمارکس دیے کہ عدالت فی الوقت ملاقات کی درخواست نہیں سن رہی، تاہم بعد ازاں تحریری ہدایت جاری کرتے ہوئے کہا گیا کہ جیل حکام آج ہی ملاقات کو یقینی بنائیں۔

سماعت کے دوران جیل حکام نے بانی پی ٹی آئی کے ’ایکس‘ اکاؤنٹ پر پابندی سے متعلق کیس کی رپورٹ عدالت میں جمع کرائی۔

دوسری جانب، نیشنل سائبر کرائم انویسٹی گیشن ایجنسی (NCCIA) نے عدالت سے اپنا جواب جمع کرانے کے لیے مزید وقت مانگ لیا۔