جامن شوگرکےمریضوں کیلئے مفیدقرار
ماہرین صحت نے موسم گرما کے ذائقہ دار پھل جامن کو شوگرکے مریضوں کیلئے مفید قرار دیدیا۔
جامن موسمِ گرما کے ذائقہ دار اور مفید اجزاء کے حامل پھلوں میں سے ایک ہے جو کہ انسانی صحت کے لیے متعدد مثبت اثرات رکھتا ہے۔ ماہرین جامن کو صحت کا خزانہ مانتے ہیں اور کئی طبی مسائل سے بچنے اور ان کو دور کرنے کے لیے مریضوں کو تجویز کرتے ہیں۔
جامن میں جیمبولین جیسے مرکبات موجود ہوتے ہیں جو خون میں شوگر کی سطح کو قابو رکھنے میں مدد دیتے ہیں، جس کی وجہ سے یہ پھل ذیا بیطس کے مریضوں کے لیے فائدہ مند ہوتا ہے۔ فائبر اور اینٹی آکسیڈنٹس سے سے بھرپور ہونے کی وجہ سے جامن ہاضمے کو بہتر بناتی ہے، قبض سے بچاتی ہے اور معدے کو قدرتی طریقے سے صاف کرتی ہے۔
جامن میں موجود وٹامن سی اور آئرن خون کی گردش کو بہتر بناتے ہیں اور جِلد کو قدرتی اور صحت مند چمک دیتے ہیں۔ جامن کے پتوں اور گٹھلیوں میں اینٹی بیکٹیریل خصوصیات ہوتی ہیں جو مسوڑھوں کے انفیکشنز، منہ کی بدبو اور منہ کے السر سے لڑنے میں مدد دیتی ہیں۔ کم مقدار میں کیلوریز اور بھرپور فائبر کی حامل جامن وزن کو قابو رکھنے میں بھی مدد دیتی ہے۔
