یکم جنوری تا 30 جون 2025: توشہ خانہ میں جمع تحائف کی فہرست جاری
کابینہ ڈویژن نے یکم جنوری 2025 سے 30 جون 2025 تک موصول ہونے والے توشہ خانہ کے تحائف کا ریکارڈ جاری کر دیا۔
کابینہ ڈویژن کے مطابق تحائف وصول کرنے والوں میں صدرِ مملکت، وزیراعظم، نائب وزیراعظم، وزیراعلیٰ پنجاب، وزیر داخلہ، تینوں مسلح افواج کے سربراہان اور دیگر شخصیات شامل ہیں۔
جاری کیے گئے ریکارڈ کے مطابق تحائف میں ڈیکوریشن پیسز، گھڑیاں، الیکٹرک گاڑی، قالین، جائے نماز، ٹیبل کلاتھ اور کافی سیٹ سمیت مختلف اشیاء شامل ہیں۔ بتایا گیا ہے کہ تمام وصول کنندگان نے تحائف توشہ خانہ میں جمع کرا دیے ہیں، جبکہ کابینہ ڈویژن ان کا تخمینہ بھی لگوا رہا ہے۔
وزیراعظم شہباز شریف کے تحائف
2025 کی پہلی ششماہی کے دوران وزیراعظم شہباز شریف کو 2 گھڑیاں، منبرِ رسول ﷺ کا ماڈل، 2 کتابیں، 3 شیلڈز، ایک فریم شدہ تصویر، ایک پلیٹ، لکڑی کا باکس، ہینڈ میڈ سلک کارپٹ، مراکش کا ماڈل، 2 روایتی کپ، ہاتھی کا ماڈل، ایک ڈیکوریشن پیس، یاک واز اور ہینڈ بیگ سمیت کئی تحائف موصول ہوئے۔
صدر مملکت آصف زرداری کے تحائف
صدر آصف زرداری کو کارپٹ، کافی سیٹ، 2 واز، ٹیبل کلاتھ، بیڈ شیٹ، لیڈیز سوٹ، ونڈ ٹربائن ماڈل، پینٹنگ فریم، پین، کف لنک سیٹ، شیلڈ اور ایک الیکٹرک وہیکل تحفے میں دیے گئے۔
سروسز چیفس کے تحائف
چیف آف آرمی اسٹاف فیلڈ مارشل سید عاصم منیر کو ترکیہ کے صدر کی جانب سے ٹی سیٹ دیا گیا۔ ائیر چیف مارشل ظہیر احمد بابر سدھو کو ڈش آئٹم اور چیف آف نیول اسٹاف ایڈمرل نوید اشرف کو بھی ٹی سیٹ تحفے میں ملا۔
