جیئند ہوت 12ویں حب جیپ ریلی کراس کے فاتح قرار
نوجوان ریسر جیئند ہوت نے ایک بار پھر بڑے بڑے ناموں کو پیچھے چھوڑ کر 12ویں حب جیپ ریلی کراس 2025 کاٹائٹل نام کرلیا۔
ابھرتے ہوئے نوجوان ریسر جیئند ہوت ٹائٹل نام کرکےاپنے اعزاز کا کامیابی سے دفاع کیا۔
جیئند ہوت نے پری پیئرڈ اے کیٹیگری میں 50 کلو میٹر کا مشکل ٹریک صرف 30 منٹ اور 26 سیکنڈز میں مکمل کرکے پہلی پوزیشن حاصل کی، جبکہ رضا سعید دوسرے اور تیمور خواجہ تیسرے نمبر پر رہے۔
دیگر کیٹیگریز میں بھی زبردست مقابلے ہوئے۔ پری پیئرڈ بی کیٹیگری میں زرین مگسی، سی میں بہواگ مزاری اور ڈی میں شکیل برچونڈی فاتح قرار پائے۔ اسٹاک اے کیٹیگری میں حمل ہوتھ، بی میں عزمری سرانجام، سی میں علی لغاری اور ڈی میں عثمان ہراج نے کامیابیاں اپنے نام کیں۔
خواتین ڈرائیورز میں دینا پٹیل نے شاندار کارکردگی دکھاتے ہوئے ویمنز چیمپئن شپ جیت لی۔ انہوں نے مقررہ فاصلہ 26 منٹ اور 0.8 سیکنڈز میں طے کیا، جبکہ ویمن اسٹاک میں ماروی عامر اور ویٹرنز کیٹیگری میں میر عامر مگسی کامیاب رہے۔
موٹر بائیک کیٹیگری میں بھی دلچسپ مقابلے ہوئے جن میں 250 سی سی میں عبدالہادی خان اور 450 سی سی میں ضیغم چوہان نے کامیابی حاصل کی۔ ٹرک کیٹیگری میں مورچہ خیل فاتح رہے۔
حب ریلی کراس کے دوران شیڈول 6 ایونٹس کی 14 کیٹیگریز میں ڈرائیورز نے بھرپور جوش و خروش کے ساتھ شرکت کی۔ اس بار ایونٹ کی خاص بات یہ تھی کہ پہلی بار الیکٹرک کیٹیگری بھی شامل کی گئی۔
