سلمان علی آغا کی سنچری، پاکستان نے سری لنکا کو 306 رنز کا ہدف دے دیا

راولپنڈی: پاکستان، سری لنکا اور انگلینڈ کے درمیان جاری سہ ملکی ون ڈے سیریز کے پہلے میچ میں پاکستان نے سری لنکا کو جیت کے لیے 306 رنز کا ہدف دیا ہے۔ سری لنکا نے ٹاس جیت کر پہلے فیلڈنگ کا فیصلہ کیا، جس کے بعد پاکستانی ٹیم 49.5 اوورز میں 305 رنز بنا کر آؤٹ ہوگئی۔

پاکستان کی پہلی وکٹ 23 رنز کے مجموعی اسکور پر گری، جب صائم ایوب 7 رنز بنا کر پویلین لوٹ گئے۔ اس کے بعد فخر زمان بھی 16 رنز بنا کر آؤٹ ہوگئے۔ پاکستان کی تیسری وکٹ 106 رنز پر گری، جب بابر اعظم 45 رنز کی اننگز کھیل کر آؤٹ ہوئے۔

سلمان علی آغا نے شاندار بیٹنگ کا مظاہرہ کرتے ہوئے 90 گیندوں پر 107 رنز بنائے۔ ان کے علاوہ سعد بیگ نے 39، حسن نواز نے 37 اور عرفات منہاس نے 18 رنز اسکور کیے۔

سری لنکا کی جانب سے ایشان ملنگا نے 4 وکٹیں حاصل کیں، جبکہ اسیتھا فرنانڈو نے 3 اور دلشان مدوشنکا نے 2 پاکستانی کھلاڑیوں کو آؤٹ کیا۔
اس میچ میں پاکستان کے وکٹ کیپر بیٹر سعد بیگ نے ون ڈے انٹرنیشنل کرکٹ میں ڈیبیو کیا۔

پاکستانی ٹیم کی قیادت شاہین آفریدی کر رہے ہیں۔ ٹیم میں سعد بیگ کے علاوہ صائم ایوب، فخر زمان، بابر اعظم، حسن نواز، سلمان علی آغا، عرفات منہاس، فہیم اشرف، نسیم شاہ اور حارث رؤف شامل ہیں۔
واضح رہے کہ اس ٹرائی نیشن سیریز میں پاکستان اور سری لنکا کے علاوہ انگلینڈ کی ٹیم بھی حصہ لے رہی ہے۔