مریم نواز کا مری کے لیے ٹرین اور مفت گرین لائن بس سروس کا اعلان

وزیراعلیٰ پنجاب مریم نواز نے سیاحتی شہر مری کے لیے کئی ٹرین اور مفت گرین لائن بس سروس سمیت بڑے ترقیاتی منصوبوں کا اعلان کرتے ہوئے کہا ہے کہ حکومت مری کو نہ صرف ایک ماڈل ضلع بلکہ عالمی معیار کا سیاحتی مقام بنانے کے لیے بھرپور اقدامات کر رہی ہے۔

مری میں ایک تقریب سے خطاب کرتے ہوئے مریم نواز نے بتایا کہ مختصر مدت میں نواز شریف کارڈیالوجی سینٹر کی تعمیر مکمل کی گئی، جو اب باقاعدہ کام شروع کر چکا ہے۔ انہوں نے کہا کہ ابتدائی طور پر پانچ مریضوں کی انجیوگرافی ہو چکی ہے جبکہ چند دنوں میں کارڈیک سرجری بھی شروع کی جائے گی۔ ان کا کہنا تھا کہ یہ سہولت نہ صرف مری بلکہ گرد و نواح کے علاقوں جیسے گلیات کے عوام کے لیے بھی ایک نعمت ثابت ہو گی۔

انہوں نے کہا کہ پہلے مری کا انتظام راولپنڈی سے چلایا جاتا تھا، لیکن اب مری کو مکمل ضلع کا درجہ مل چکا ہے اور اس کے تمام شعبے — پولیس، تعلیم، صحت — مکمل طور پر علیحدہ اور خودمختار کر دیے گئے ہیں۔

وزیراعلیٰ پنجاب نے اعلان کیا کہ مری کے لیے ایک نیا واٹر سپلائی پراجیکٹ، سینیٹیشن اسکیم، اسکولوں کی اپ گریڈیشن، اور ایک خصوصی ٹورازم فورس تشکیل دی گئی ہے تاکہ شہر کو سیاحوں کے لیے ایک صاف، محفوظ اور جدید مقام بنایا جا سکے۔

اس کے علاوہ مری کے لیے ریلوے سروس بھی شروع کی جائے گی تاکہ سیاحوں کو اپنی گاڑیاں لانے کی ضرورت نہ پڑے۔

وزیراعلیٰ نے مری میں ایکسپریس وے کی تعمیر، ستھرا پنجاب پروگرام کے تحت صفائی مہم، اور بھوربن میں جدید اسپتال کے قیام کا بھی اعلان کیا۔ انہوں نے ضلعی انتظامیہ کو ہدایت دی کہ ساملی اسپتال کے لیے فوری طور پر 3 بسیں چلائی جائیں۔

اپنے خطاب میں مریم نواز نے کہا کہ "اعلانات کرنا آسان، لیکن انہیں عملی جامہ پہنانا مشکل ہوتا ہے۔ ہم نے وہ کام بھی مکمل کیے جن کا اعلان نہیں کیا تھا۔ جو لوگ صرف دعوے کرتے ہیں، وہ کام نہیں کرتے۔ ہم نے ہر چیلنج کا میدان میں مقابلہ کیا — یہاں تک کہ جب پنجاب بدترین سیلاب سے دوچار تھا، ہم دفتر میں نہیں بیٹھے بلکہ فیلڈ میں موجود رہے۔”