نو مئی کیس : علیمہ خان کے بیٹے شاہ ریز کا 8 روزہ جسمانی ریمانڈ منظور
لاہور کی انسداد دہشت گری عدالت نے 9 مئی 2023 کو جناح ہاؤس پر حملے کے کیس میں علیمہ خان کے بیٹے شاہ ریز کا 8 روزہ جسمانی ریمانڈ منظو کرلیا۔
9 مئی کے مقدمے میں انسداد دہشت گردی عدالت میں عمران خان کی ہمشیرہ علیمہ خان کے بیٹے شاہ ریز کو پیش کیا گیا، عدالت نے پولیس کی جانب سے ریمانڈ کی درخواست منظور کرتےہوئے ملزم شاہ ریز کا 8 روزہ جسمانی ریمانڈ منظور کرلیا۔
لاہور پولیس نےگزشتہ روز زمان پارک سے گرفتار علیمہ خان کے بیٹے شاہ ریز کو انسداد دہشت گردی عدالت میں پیش کیا اور ایک ماہ کے جسمانی ریمانڈ کی استدعا کی۔شاہ ریز کے وکیل سلمان اکرم راجہ نے جسمانی ریمانڈ دینے کی مخالفت کی تھی،جس کےبعد عدالت نے فیصلہ محفوظ کرلیا تھا۔
بعد ازاں عدالت نے پولیس کی ایک ماہ کا ریمانڈ دینے کی استدعا مسترد کرتے ہوئے شاہ ریز کا 8 روزہ جسمانی ریمانڈ منظور کیا۔
یاد رہے کہ علیمہ خان نے گزشتہ روز الزام عائد کیا تھاکہ 4 مسلح افراد نے ان کے بیٹے شاہ ریز کو اغوا کر لیا ہے۔بعد ازاں لاہور پولیس نے شاہ ریز کو گرفتار کرنے کی تصدیق کردی تھی، پولیس حکام کا کہنا تھا کہ شاہ ریز کو 9 مئی 2023 کے مقدمات میں گرفتار کیاگیا ہے۔
