گھانا میں فوجی ہیلی کاپٹر حادثہ، دو وزرا سمیت 9 افراد جاں بحق

افریقی ملک گھانا کے جنوبی علاقے میں ایک فوجی ہیلی کاپٹر المناک حادثے کا شکار ہو گیا، جس کے نتیجے میں دو وزرا سمیت 9 افراد جاں بحق ہو گئے۔
حادثہ گھانا کے جنوبی حصے میں اُس وقت پیش آیا جب دورانِ پرواز فوجی ہیلی کاپٹر گر کر تباہ ہو گیا۔
حکومتی ترجمان نے اس افسوسناک سانحے کی تصدیق کرتے ہوئے بتایا کہ جاں بحق ہونے والوں میں وزیر دفاع اور وزیر ماحولیات بھی شامل ہیں۔ دیگر ہلاک شدگان میں گھانا ایئر فورس کے تین اہلکاروں سمیت مختلف سرکاری عہدیدار شامل ہیں۔
گھانا کے صدر نے اس واقعے کو "قومی سانحہ” قرار دیتے ہوئے ہلاک ہونے والوں کے اہل خانہ سے دلی ہمدردی اور تعزیت کا اظہار کیا ہے۔
گھانا کی فوج کی جانب سے جاری بیان میں بتایا گیا ہے کہ حادثے سے کچھ دیر قبل ہیلی کاپٹر کا کنٹرول روم سے رابطہ منقطع ہو گیا تھا۔ واقعے کی وجوہات جاننے کے لیے تحقیقات شروع کر دی گئی ہیں۔