محسن نقوی کی شہداء ، غازیوں کے لیے 78 سول اعزازات کی منظوری

وفاقی وزیر داخلہ محسن نقوی نے وطن عزیز کے لیے جانیں نچھاور کرنے والے شہداء اور شجاعت و بہادری کا مظاہرہ کرنے والے غازیوں کے لیے سول اعزازات دینے کی منظوری دے دی۔

وفاقی وزیر داخلہ محسن نقوی کی زیرِ صدارت گیلنٹری ایوارڈز سے متعلق خصوصی کمیٹی کا اجلاس اسلام آباد میں منعقد ہوا، جس میں مختلف کیٹیگریز میں 78 افراد کے لیے سول اعزازات کی منظوری دی گئی۔

اجلاس کے دوران ملک و قوم کے لیے جانوں کا نذرانہ پیش کرنے والے شہداء اور غیر معمولی شجاعت کا مظاہرہ کرنے والے افراد کی خدمات کو سراہا گیا۔

اس موقع پر وفاقی وزیر داخلہ محسن نقوی نے کہا کہ ملک و قوم کی خاطر جانوں کا نذرانہ پیش کرنے والوں اور غیر معمولی شجاعت کا مظاہرہ کرنے والے افراد کی حوصلہ افزائی قومی ذمہ داری ہے۔

انہوں نے کہا کہ وطن عزیز اپنے شہداء اور غازیوں کی لازوال قربانیوں کا احسان مند ہے، جبکہ شہداء اور غازیوں کی عظیم قربانیاں قوم کا سرمایہ ہیں۔

راولا کوٹ: پاک فوج کا شہریوں کے لیے مفت میڈیکل کیمپ کا انعقاد

اجلاس میں وزیر مملکت برائے داخلہ طلال چوہدری، وفاقی سیکرٹری داخلہ، ڈی جی ایف آئی اے، ایڈیشنل سیکرٹری کابینہ اور دیگر متعلقہ حکام نے شرکت کی، جبکہ چاروں صوبوں کے نمائندوں نے ویڈیو لنک کے ذریعے اجلاس میں شرکت کی۔