پاکستان شاہینز کی شاندار شروعات، بنگلادیش اے کو 79 رنز سے شکست

آسٹریلیا میں جاری ٹاپ اینڈ ٹی20 سیریز کے افتتاحی میچ میں پاکستان شاہینز نے شاندار کارکردگی دکھاتے ہوئے بنگلادیش اے کو 79 رنز سے ہرا کر پہلی کامیابی اپنے نام کرلی۔
پہلے بیٹنگ کرتے ہوئے پاکستان شاہینز نے مقررہ 20 اوورز میں 4 وکٹوں کے نقصان پر 227 رنز بنائے۔ خواجہ نافع نے 8 چوکوں اور 2 چھکوں کی مدد سے 61 رنز اسکور کیے، یاسر خان نے 62 رنز کی اننگز کھیلی جس میں 7 چوکے اور 2 چھکے شامل تھے، جب کہ عبدالصمد 56 رنز پر ناٹ آؤٹ رہے۔
ہدف کے تعاقب میں بنگلادیش اے کی پوری ٹیم 17ویں اوور میں 148 رنز پر آؤٹ ہوگئی۔ فیصل اکرم اور سعد مسعود نے تین، تین کھلاڑیوں کو پویلین کی راہ دکھائی۔
پاکستان شاہینز اپنا دوسرا میچ ہفتے کو پرتھ اسکارچر اکیڈمی کے خلاف کھیلے گی۔