پی سی بی کا ڈومیسٹک ون ڈے ٹورنامنٹ کا شیڈول تیار
پی سی بی نے آئندہ سال ہونے والے آئی سی سی کرکٹ ورلڈ کپ 2027ء کی تیاریوں کے لیے ایک بڑے اور اہم ترین ڈومیسٹک ون ڈے ٹورنامنٹ کا شیڈول تیار کرلیا۔
ترجمان پی سی بی کے مطابق 4ٹیموں پر مشتمل اہم ترین ڈومیسٹک ون ڈے ٹورنامنٹ آئندہ ماہ 11 سے 18 اگست تک ملتان کے تاریخی میدان پر کھیلا جائے گا۔ اس اہم معرکے میں شرکت پاکستان کے تمام مایہ ناز اور مرکزی وائٹ بال کرکٹرز کے لیے لازمی قرار دی گئی ہے تاکہ ورلڈ کپ جیسے بڑے ایونٹ سے قبل ملک کے بہترین ٹیلنٹ کو ایک انتہائی مسابقتی ماحول میں پرکھا جاسکے۔
پی سی بی کے ڈائریکٹر ہائی پرفارمنس عاقب جاوید کا کہنا ہے کہ چونکہ ورلڈ کپ میں اب تقریباً 18 ماہ کا وقت رہ گیا ہے، اس لیے تیاریوں کے باقاعدہ آغاز کے لیے یہ بالکل موزوں ترین وقت ہے۔
انہوں نے انکشاف کیا کہ قومی سلیکٹرز اور کوچنگ سٹاف نے سر جوڑ کر ایک ایسی حکمتِ عملی تیار کی ہے جس کے تحت چار انتہائی متوازن ٹیمیں میدان میں اتاری جائیں گی۔
دلچسپ بات یہ ہے کہ ہر میچ کے لیے پلیئنگ الیون کا فیصلہ بھی سلیکٹرز اور کوچز خود کریں گے تاکہ کھلاڑیوں کو ان کے مخصوص کردار کے مطابق جانچا جا سکے اور مستقبل کے لیے ایک مضبوط ترین بنیادی اسکواڈ فائنل کیا جا سکے۔
دوسری جانب یہ ٹورنامنٹ ان پاکستانی کھلاڑیوں کے لیے بھی بڑی اہمیت کا حامل ہے جو ویسٹ انڈیز کی مشہور لیگ، کیریبین پریمیئر لیگ(سی پی ایل) کا حصہ ہیں۔
سی پی ایل کا آغاز 7 اگست سے ہورہا ہے، تاہم پی سی بی نے اس بات کو یقینی بنایا ہے کہ جیسے ہی 18 اگست کو ملتان کا یہ ٹورنامنٹ اپنے اختتام کو پہنچے گا، ویسے ہی صائم ایوب، عثمان خان، صاحبزادہ فرحان اور سفیان مقیم سمیت تمام اہل کھلاڑیوں کو لیگ کے بقیہ میچز کھیلنے کے لیے فوری طور پر این او سی جاری کردیے جائیں گے۔
