یومِ عاشور پر صدر مملکت آصف علی زرداری اور وزیراعظم شہباز شریف کا قوم کو پیغام
صدرِ مملکت آصف علی زرداری اور وزیراعظم شہباز شریف نے یومِ عاشور کے موقع پر قوم کے نام اپنے پیغامات میں حضرت امام حسین رضی اللہ تعالیٰ عنہ اور ان کے جانثار ساتھیوں کی عظیم قربانی کو شاندار خراجِ عقیدت پیش کیا ہے، اور اسے امتِ مسلمہ کا مشترکہ اور لازوال سرمایہ قرار دیا ہے۔
صدرِ مملکت نے اپنے پیغام میں کہا کہ یومِ عاشور ہمیں قربانی، حق گوئی اور عزم و استقلال کا درس دیتا ہے۔ یہ دن امام حسینؓ اور ان کے باوفا رفقا کی عظیم شہادت کی یاد دلاتا ہے، جنہوں نے ظلم و جبر کے خلاف ابدی جدوجہد کی ایک روشن مثال قائم کی۔
صدر زرداری نے مزید کہا کہ واقعۂ کربلا صبر، وفا اور قربانی کی وہ بے نظیر داستان ہے جو رہتی دنیا تک انسانیت کو راہِ ہدایت دکھاتی رہے گی۔ ان کے بقول، کربلا ہر دور کے اندھیروں میں حق کا چراغ روشن کرتا ہے۔
وزیراعظم شہباز شریف نے یومِ عاشور کو تاریخِ اسلام کا ایک عظیم اور سبق آموز دن قرار دیا۔ اپنے پیغام میں انہوں نے کہا کہ حضرت امام حسینؓ اور ان کے وفادار ساتھیوں نے دینِ اسلام کی سربلندی، عدل و انصاف، اور اصولوں کی خاطر اپنی جانوں کا نذرانہ پیش کیا۔
یوم عاشور: ملک بھر میں جلوسوں کا انعقاد، سیکیورٹی کے سخت انتظامات
وزیراعظم کا کہنا تھا کہ امام حسینؓ کی قربانی ہمیں صبر، استقامت اور اصولوں پر ثابت قدم رہنے کا درس دیتی ہے، جو تا قیامت انسانیت کے لیے مشعلِ راہ بنی رہے گی۔
انہوں نے اس بات پر زور دیا کہ آج جب قوم کو مختلف داخلی و خارجی چیلنجز کا سامنا ہے، تو ہمیں حضرت امام حسینؓ کی سیرت اور ان کی تعلیمات سے رہنمائی لینے کی ضرورت ہے۔
وزیراعظم نے کہا کہ امام عالی مقام کی جدوجہد اتحاد، استقامت اور حق سے وابستگی کی روشن مثال ہے، اور ان کی قربانی پوری امتِ مسلمہ کا قیمتی اثاثہ ہے۔
