وزیرِ اعظم فیوچر انویسٹمنٹ انیشی ایٹیو کانفرنس میں شرکت کیلئے سعودی عرب روانہ
وزیرِ اعظم محمد شہباز شریف سعودی ولی عہد و وزیرِ اعظم محمد بن سلمان کی خصوصی دعوت پر فیوچر انویسٹمنٹ انیشی ایٹیو کی نویں کانفرنس میں شرکت کے لیے ریاض روانہ ہو گئے۔
وزیرِ اعظم کے ہمراہ نائب وزیرِ اعظم و وزیرِ خارجہ سینیٹر محمد اسحاق ڈار، وفاقی وزیرِ خزانہ محمد اورنگزیب، وفاقی وزیرِ اطلاعات و نشریات عطاء اللہ تارڑ اور معاونین خصوصی طارق فاطمی اور بلال بن ثاقب بھی شامل ہیں۔
کانفرنس میں عالمی رہنما، سرمایہ کار، پالیسی ساز اور دیگر شعبوں کے ماہرین شریک ہوں گے، جہاں وزیرِ اعظم پاکستان کی نمائندگی کریں گے۔
شہباز شریف کانفرنس میں پائیدار ترقی، اقتصادی شمولیت، جدت اور عالمی جغرافیائی سیاست میں تبدیلیوں پر ہونے والی گفتگو میں شرکت کریں گے اور پاکستان کا نقطہ نظر پیش کریں گے۔
وزیرِ اعظم اپنے دورے کے دوران سعودی قیادت سے ملاقاتیں بھی کریں گے، جن میں تجارت، سرمایہ کاری، توانائی اور افرادی قوت کے شعبوں میں تعاون بڑھانے پر بات ہوگی۔
ان ملاقاتوں میں بین الاقوامی اور علاقائی امور اور پاکستان میں سرمایہ کاری اور پائیدار ترقی کے لیے تعاون کی استعداد پر بھی گفتگو ہوگی۔
