پی ایس ایل فائنل پاک بحریہ کےنام،سٹیڈیم پاکستان کے نعروں سے گونج اٹھا
کوئٹہ گلیڈی ایٹرز اور لاہور قلندرز کے مابین پی ایس ایل کا فائنل پاک بحریہ کے نام،قذفی سٹیڈیم پاکستان زندہ باد کے نعروں سے گونج اٹھا۔
فائنل کی تقریب میں پاکستان بحریہ کو خراج تحسین پیش کرنے کے لیے تقریب کا انعقاد کیا گیا۔
بھارت کے خلاف آپریشن ’بنیان مرصوص‘ کے دوران بھرپور کردار پر پاکستان نیوی کو خراج تحسین پیش کیا گیا، نیول چیف ایڈمرل نوید اشرف نے تقریب میں شرکت کی۔
چیئرمین پاکستان کرکٹ بورڈمحسن نقوی، وفاقی وزیر خزانہ محمد اورنگزیب سمیت تماشائیوں کی بڑی تعداد اسٹیڈیم میں موجود تھی۔
اسٹیڈیم میں موجود شائقین کرکٹ پاکستان زندہ باد، پاکستان بحریہ زندہ باد کے نعرے لگا رہے تھے، جبکہ ملی نغمہ بھی پیش کیا گیا، جس پر شائقین کی جانب سے بھرپور داد دی گئی۔
پاک بحریہ نے آپریشن ’بنیان مرصوص‘ کے دوران دشمن کی ہر چال کو ناکام بنایا، پاک نیوی کے جوانوں کو الرٹ دیکھ کر دشمن وار کرنے کی جرات نہ کر سکا، آج پی ایس ایل کے فائنل میں پاکستان بحریہ کے اس کردار کو سراہا گیا۔
پاک بحریہ نے خصوصی ویڈیو بھی جاری کی، جس میں سربراہ پاک بحریہ نے پیغام دیا کہ آئندہ بھی پاک بحریہ دشمن کے خلاف سیسہ پلائی دیوار ثابت ہوگی۔
