PSL ٹیم مالکان کا مطالبہ تسلیم کر لیا گیا، بورڈ کا ہنگامی اجلاس آج
پاکستان سپر لیگ (پی ایس ایل) انتظامیہ اور فرنچائز مالکان کے درمیان اہم اجلاس آج طلب کر لیا گیا ہے۔
ذرائع کے مطابق فرنچائز مالکان نے پی ایس ایل مینجمنٹ سے ملاقات کے دوران اجلاس بلانے کا مطالبہ کیا تھا، جسے منظور کر لیا گیا ہے۔
اجلاس میں پی ایس ایل 2026 اور 2027 سے متعلق خدشات اور تحفظات پر تفصیلی غور کیا جائے گا، جبکہ پی سی بی حکام اس موقع پر اپنے مؤقف سے آگاہ کریں گے۔
اجلاس نیشنل کرکٹ اکیڈمی میں ہوگا، جس میں تمام چھ فرنچائزز، بشمول ملتان سلطانز، کو مدعو کیا گیا ہے۔
ذرائع کا کہنا ہے کہ فرنچائز مالکان نے کمرشل معاملات، ایونٹ کی ونڈو اور ای وائی (EY) ایویلیوایشن رپورٹ پر بریفنگ دینے کا مطالبہ کیا ہے، جب کہ دو سالہ ٹائٹل اسپانسرشپ معاہدے کے طریقہ کار پر بھی وضاحت مانگی گئی ہے۔
پی سی بی نے پاکستان سپر لیگ میں دو نئی ٹیمیں شامل کرنے کا فیصلہ کیا ہے، اور لیگ کے 10 سال مکمل ہونے پر رواں ماہ فرنچائزز کے ساتھ نیا معاہدہ بھی کیا جائے گا۔
پی ایس ایل کے چیف ایگزیکٹو آفیسر سلمان نصیر کے مطابق، آئندہ سیزن سے پی ایس ایل میچز کا دائرہ کار لاہور، کراچی، راولپنڈی اور ملتان کے ساتھ فیصل آباد اور پشاور تک بڑھایا جائے گا۔
انہوں نے مزید بتایا کہ نئی ٹیم کے لیے نومبر میں ٹینڈر جاری کیے جائیں گے، اور دلچسپی رکھنے والے سرمایہ کار مختلف شہروں کے ناموں میں سے اپنی پسند کا نام منتخب کر سکیں گے۔
