تحریک انصاف کی عمران خان سے ملاقات کے لیے کوششیں تیز

پاکستان تحریک انصاف کےمرکزی رہنما عمر ایوب کا کہنا ہے ہم عمران خان سےملاقات کرنا چاہتے ہیں لیکن حکومت اپنی بات سے مکررہی ہے۔

پی ٹی آئی رہنماؤں کی بانی پی ٹی آئی عمران خان سےملاقات کیلئےکوششیں جاری ہیں اور قومی اسمبلی میں اپوزیشن لیڈر عمرایوب کی ہدایت پر فیصل چوہدری نے جیل حکام سےرابطہ کیا ہے۔

اس حوالے سےفیصل چوہدری ایڈووکیٹ کا کہنا ہے کہ عمر ایوب کی ہدایات پرجیل حکام سے ملاقات کیلئے رابطہ کیا گیا، کوشش ہےکہ مذاکرات کےتیسرے مرحلے سے قبل بانی سے ملاقات ممکن ہو۔

فیصل چوہدری کا کہنا تھا جیل حکام کو بتایا آج ملاقات کا دن ہے لہٰذا ملاقات کا بندوبست کیا جائے،جیل حکام نے تاحال مذاکراتی کمیٹی کی ملاقات سےمتعلق کچھ نہیں بتایا۔

دوسری جانب جوڈیشل کمپلیکس اسلام آبادمیں میں میڈیا سے گفتگو کرتےہوئے پی ٹی آئی رہنما عمرایوب کا کہنا تھا مذاکرات سےمتعلق تین مطالبات ہیں، 9 مئی، 26 نومبر کا جوڈیشل کمیشن اورکارکنان کی رہائی مطالبات میں شامل ہیں۔

30ارب روپے قرضہ اتارنے کیلئے فنڈ مختص کیے گئے، علی امین گنڈا پور

عمرایوب کا کہنا تھا بانی پی ٹی آئی سے ملاقات چاہتے ہیں لیکن ملاقات نہیں کرائی گئی، ہمیں بتایا گیا کہ ملاقات کرانا جیل مینوئل میں شامل نہیں،حکومت اپنی بات سے مکر رہی ہے، اگر حکومت واقعی اختیاررکھتی ہے تو بانی پی ٹی آئی سے ملاقات کرائیں۔

خیال رہےکہ گزشتہ روز حکومت کی مذاکراتی کمیٹی کے ترجمان سینیٹرعرفان صدیقی نے بھی اس بات کا اعتراف کیا تھا کہ پی ٹی آئی کی مذاکراتی کمیٹی سے بات نہیں کرائی جا سکی۔

ان کا کہنا تھا ہم جو وعدہ کرتے ہیں اُسے عملی جامہ پہنانا چاہیےتاکہ ہم جب اُن سے وعدہ پورا کرنے کا کہیں تو ہماری بات میں زیادہ وزن ہو۔

عرفان صدیقی نےکہا کہ جب ہم نے پی ٹی آئی کی مذاکراتی کمیٹی کی عمران خان سےملاقات کرانے کی کمٹمنٹ دے دی تھی تو پوری کرنی چاہیے تھی، البتہ کمیٹی کا کوئی رکن ملاقات کرانےکےلیےذمہ دار نہیں ہے۔