پنجاب حکومت نے شہداء ملازمین کے لیے خصوصی پیکیج کی منظوری دے دی

پنجاب حکومت نے فرائض کی انجام دہی کے دوران شہید ہونے والے سرکاری ملازمین کے لیے شہداء پیکیج کی منظوری دے دی ہے۔

یہ منظوری وزیر قانون پنجاب، ملک صہیب احمد کی زیر صدارت ہونے والے اجلاس میں دی گئی، جس میں سرکاری فرائض کے دوران جان کا نذرانہ دینے والے ملازمین کے اہل خانہ کے لیے مالی اور رہائشی مراعات کے پیکیج کی منظوری شامل تھی۔

ملک صہیب احمد نے پولیس کے 17 شہداء کو مالی امداد اور گھر دینے کا اعلان کیا۔ ان کے مطابق پیکیج ٹو کے تحت شہید اے ایس آئی کے ورثا کو 50 لاکھ روپے، گھر اور دیگر مراعات دی جائیں گی۔

اسی پیکیج کے تحت شہید کانسٹیبل اور ہیڈ کانسٹیبل کے لواحقین کو 40 لاکھ روپے، رہائش اور دیگر سہولیات فراہم کی جائیں گی۔

جب کہ پیکیج تھری کے تحت شہید کانسٹیبل اور ٹریفک وارڈن کے ورثا کو 35 لاکھ روپے اور دیگر مراعات دی جائیں گی۔

صوبائی وزیر نے مزید کہا کہ پیکیج تھری کی کیٹیگری میں شامل شہداء کے اہل خانہ کو بھی گھر فراہم کرنے کا فیصلہ کیا گیا ہے، جس کے لیے پیکیج تھری کے قواعد میں ترمیم کی جائے گی، اور یہ تبدیلی پنجاب کابینہ سے منظور کرائی جائے گی۔