5 ستمبر تک بارشیں، پی ڈی ایم اے نے سیلابی الرٹ جاری کر دیا

پنجاب کے مختلف اضلاع میں 5 ستمبر تک وقفے وقفے سے بارشوں کی پیشگوئی کی گئی ہے، جس کے باعث صوبے میں سیلابی صورتحال پیدا ہونے کا خدشہ بڑھ گیا ہے۔

پنجاب ڈیزاسٹر مینجمنٹ اتھارٹی (پی ڈی ایم اے) کے مطابق دریاؤں میں پانی کی سطح خطرناک حد تک بلند ہو چکی ہے۔

دریائے چناب میں مرالہ ہیڈ ورکس پر پانی کی سطح 4 لاکھ 68 ہزار کیوسک، خانکی پر 3 لاکھ 39 ہزار 470 کیوسک، اور قادرآباد پر 2 لاکھ 32 ہزار 450 کیوسک ریکارڈ کی گئی ہے، جب کہ چنیوٹ پل پر پانی کا بہاؤ 1 لاکھ 8 ہزار 343 کیوسک ہے۔

اسی طرح تریموں پر 3 لاکھ 55 ہزار 744 کیوسک، دریائے راوی کے مختلف مقامات جیسے جسڑ پر 71,010، راوی سائفن پر 54,190، شاہدرہ پر 53,630، بلوکی پر 1 لاکھ 17 ہزار 655 اور سدھنائی پر 1 لاکھ 93 ہزار 470 کیوسک کا بہاؤ رپورٹ ہوا ہے۔ دریائے ستلج میں جی ایس والا پر 2 لاکھ 69 ہزار 501 کیوسک، سلیمانکی پر 1 لاکھ 22 ہزار 736، اسلام ہیڈ ورکس پر 95,727، اور پنجند ہیڈ ورکس پر 1 لاکھ 82 ہزار 107 کیوسک پانی کا بہاؤ جاری ہے۔

پی ڈی ایم اے نے متعلقہ اداروں کو الرٹ رہنے اور ممکنہ ہنگامی صورتحال سے نمٹنے کے لیے تمام ضروری اقدامات کی ہدایت کی ہے، جب کہ شہریوں کو نشیبی علاقوں سے دور رہنے اور احتیاطی تدابیر اختیار کرنے کی تلقین کی گئی ہے۔