5 ستمبر تک انتہائی اونچے درجے کے سیلاب کا خدشہ، ریلیف ادارے الرٹ
پنجاب کے دریاؤں میں سیلابی صورتحال برقرار ہے، اور 5 ستمبر تک دریائے راوی، ستلج اور چناب میں انتہائی اونچے درجے کے سیلاب کا خدشہ ظاہر کیا گیا ہے۔
فلڈ فورکاسٹنگ ڈویژن کے مطابق، دریائے چناب میں تریموں، دریائے راوی میں بلوکی اور سدھنائی کے مقام پر اونچے درجے کا سیلاب ریکارڈ کیا گیا ہے۔ اسی طرح دریائے ستلج میں ہیڈ سلیمانکی پر پانی کا بہاؤ 5 لاکھ 16 ہزار کیوسک تک پہنچ چکا ہے، جس میں مسلسل اضافہ ہو رہا ہے۔
ریلیف کمشنر نے خبردار کیا ہے کہ بالائی علاقوں میں مزید بارشوں کے باعث دریاؤں میں پانی کی سطح غیر معمولی حد تک بڑھ سکتی ہے، جس سے 5 ستمبر تک شدید سیلابی صورتحال پیدا ہو سکتی ہے۔
ادھر فلڈ فورکاسٹنگ ڈویژن کی رپورٹ کے مطابق، تربیلا ڈیم 100 فیصد جبکہ منگلا ڈیم 83 فیصد تک بھر چکا ہے۔ اس وقت تربیلا ڈیم کا پانی کی سطح 1549.78 فٹ جبکہ منگلا ڈیم کی سطح 1226.50 فٹ ریکارڈ کی گئی ہے۔
راول ڈیم میں بھی پانی کی سطح 1751.70 فٹ تک پہنچنے کے بعد اس کے اسپل ویز کھول دیے گئے ہیں۔
اس حوالے سے این ڈی ایم اے نے بتایا ہے کہ راول ڈیم کے اسپل ویز صبح 7 بجے کھولے گئے، اور تمام متعلقہ اداروں کو بروقت آگاہ کر دیا گیا تھا۔
این ڈی ایم اے کے مطابق، اسپل ویز کھلنے کے باعث کورنگ نالہ میں پانی کے بہاؤ میں نمایاں اضافہ متوقع ہے۔ عوام سے اپیل کی گئی ہے کہ نالے اور اس پر بنے عارضی پل عبور کرنے سے گریز کریں، کیونکہ بہاؤ کسی بھی وقت خطرناک حد تک بڑھ سکتا ہے۔
