6 ستمبر : یومِ دفاع آج بھرپور جوش و جذبے کیساتھ منایا جا رہا ہے
وطن عزیز کے دفاع میں جانوں کا نذرانہ پیش کرنے والے شہداء اور غازیوں کو خراجِ عقیدت پیش کرنے کے لیے ملک بھر میں یومِ دفاع و شہداء آج پورے جوش و جذبے کے ساتھ منایا جا رہا ہے۔
یومِ دفاع کا آغاز وفاقی دارالحکومت اسلام آباد میں 31 توپوں کی سلامی سے ہوا، جو وطن کے شہداء کو خراجِ تحسین کا مظہر ہے۔
کراچی میں مزارِ قائد پر گارڈز کی تبدیلی کی پروقار تقریب جاری ہے، جس کے مہمانِ خصوصی ائیر آفیسر کمانڈنگ، ائیر وائس مارشل شہریار خان ہیں۔ اس موقع پر پاکستان ایئر فورس اکیڈمی اصغر خان کے چاق و چوبند دستے نے گارڈز کے فرائض سنبھالے۔
وزیراعظم شہباز شریف نے اپنے خصوصی پیغام میں کہا کہ 6 ستمبر ہماری قومی تاریخ میں بہادری، اتحاد اور عزم کا دن ہے۔ انہوں نے کہا کہ 1965 کا ناقابلِ تسخیر جذبہ آج بھی پوری قوم کے دلوں میں زندہ ہے۔
وزیراعظم نے حالیہ واقعات کا حوالہ دیتے ہوئے کہا کہ افواجِ پاکستان اور عوام ایک بار پھر متحد ہو کر دشمن کے سامنے آہنی دیوار بن گئے۔ انہوں نے فیلڈ مارشل عاصم منیر کے تزویراتی ویژن کو سراہا، جس نے دشمن کے غرور کو خاک میں ملا کر نئی تاریخ رقم کی۔
شہباز شریف نے بھارتی زیرِ تسلط کشمیر کے مظلوم عوام سے یکجہتی کا اعادہ کیا اور عالمی برادری سے مطالبہ کیا کہ وہ اسرائیلی جارحیت کو روکنے میں اپنا مؤثر کردار ادا کرے۔
دوسری جانب فیلڈ مارشل عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نیول چیف اور ایئر چیف نے بھی 1965 کی جنگ کے شہداء کو زبردست خراجِ عقیدت پیش کیا۔
پاک فوج کے شعبہ تعلقاتِ عامہ (آئی ایس پی آر) نے اپنے بیان میں کہا کہ 6 ستمبر کے دن بہادر سپاہیوں نے قوم کی حمایت کے ساتھ دشمن کی کھلی جارحیت کا ڈٹ کر مقابلہ کیا۔ دشمن، جو تعداد اور ہتھیاروں میں ہم سے کہیں زیادہ تھا، اس کے مذموم عزائم کو مسلح افواج نے ناکام بنایا۔
آئی ایس پی آر نے مزید کہا کہ ہماری بہادر نسلوں کی یہ جرأت و قربانی آنے والی نسلوں کے لیے مشعلِ راہ ہے۔ پوری قوم آج اپنے شہداء، غازیوں اور ان کے باحوصلہ اہل خانہ کو سلام پیش کرتی ہے۔ افواجِ پاکستان ہمیشہ بیرونی جارحیت اور دہشت گردی کے خلاف سیسہ پلائی دیوار بنی رہیں گی
