کیا موٹر سائیکل والوں کا پٹرول اب گاڑی والے ڈلوائیں گے؟
حکومت نے پندرہ مارچ کو جہاں پٹرول کی قیمت میں پانچ روپے کا اضافہ کر دیا ہے وہیں یہ خبر بھی سامنے آئی ہے کہ موٹر سائیکل سواروں کو پٹرول پر 150 ارب روپے کی سبسڈی دینے پر غور کیا جارہا ہے اس کے لئے گاڑی والوں سے پیٹرول پر 25 سے 50 روپے فی لیٹر اضافی وصول کیۓ جائیں گے ۔ ایک انگریزی رونامے کی خبر کے مطابق وزیراعظم شہبازشریف موٹر سائیکل سواروں کیلئے پٹرول سستا کرنے کے لئے چارپہیوں کے سواروں پر ایک نیا بوجھ ڈالنے کا منصوبہ بنارہے ہیں۔
یہ تھوڑا عجیب تو لگے گا کہ اس وقت جب پاکستان بین الاقوامی مالیاتی فنڈ (آئی ایم ایف) کے ساتھ 6 ارب ڈالر کے معاہدے کے بالکل قریب ہے۔ یہ بات زیرغور لائی جارہی ہے کہ موٹر سائیکل سواروں کو پٹرول پر 150 ارب روپے کی رعایت دے دی جاۓ . پیکج کے تحت 150 ارب روپے گاڑیوں کے مالکان سے وصول کیے جائیں گے جنہیں پیٹرول پر 25 سے 50 روپے فی لیٹر اضافی ادا کرنا پڑیں گے۔اخبار نے اپنے ذرائع کے حوالے سے بتایا کہ گاڑیوں کے مالکان کے لیے پیٹرول کی قیمت 300 سے 325 روپے فی لیٹر کرنے کی کی تجویز ہے جبکہ موٹر سائیکل سواروں کے لیے اسے کم کرکے 250 سے 225 روپے فی لیٹر کرنے کی تجویز ہے۔
یہ تجویز ایک ایسے وقت میں سامنے آئی ہے جب اسٹیٹ بینک آف پاکستان (ایس بی پی) اور وزارت خزانہ نئے پیکج کے حصول کے لیے آئی ایم ایف کی شرائط پوری کرنے میں مصروف ہیں۔مالی مشکلات اورآئی ایم ایف کے مطالبات کے باوجود حکومت اب بھی نچلے اورمتوسط طبقے کے لوگوں کو ریلیف دینے کے لیے سبسڈی فراہم کرنے کی خواہاں ہے۔آئی ایم ایف وفد نے گزشتہ ماہ پاکستان کو مطالبات کی ایک لمبی فہرست دی تھی۔ آئی ایم ایف کی شرائط کا مقصد یہ یقینی بنانا ہے کہ پاکستان جون کے آس پاس اپنے سالانہ بجٹ سے قبل مالی خسارے کو کم کرے۔
پاکستان ان شرائط کے تحت زیادہ تراقدامات کرچکا ہے جن میں ایندھن اور توانائی کے نرخوں میں اضافہ، برآمد اور بجلی کے شعبوں میں سبسڈی ختم کرنا اور ضمنی بجٹ میں نئے ٹیکسوں کے ذریعے مزید محصولات پیدا کرنا شامل ہیں۔ انہی اقداما ت کے پیش نظر حکومت نے گزشتہ روز مہنگائی سے پسے عوام پر ایک اور پٹرول بم گرادیا ہے اور پٹرول 5روپے ، ہائی اسپیڈ ڈیزل 13روپے اور مٹی کا تیل تقریباً ڈھائی روپے مہنگا کردیا ہے ، پیٹرول کی نئی قیمت 272 روپے فی لیٹر ہوگی۔ نوٹیفکیشن کے مطابق ہائی اسپیڈ ڈیزل کی قیمت 293 روپے فی لیٹر ہوگی جبکہ مٹی کا تیل 2 روپے 56 پیسے مہنگا ہو کر 190 روپے 29 پیسے فی لیٹر ہوگیا۔ لائٹ ڈیزل کی قیمت برقرار رکھی گئی ہے اور نئی قیمتوں کا اطلاق گزشتہ رات 12 بجے سے آئندہ 15 روز کیلئے ہوگیا۔
وزیرخزانہ اسحاق ڈارکا مسلسل یہ کہنا ہے کہ آئی ایم ایف کی مدد ’اب کسی بھی دن‘ پہنچ جائے گی۔ تاہم جیسے جیسے آئی ایم ایف کی ٹیم کی اسلام آباد سے روانگی کے دن ہفتوں میں تبدیل ہورہے ہیں، اسحاق ڈار پربلند افراط زر اورکم زرمبادلہ کے ذخائر کے پیش نظردباؤ بڑھتا جارہا ہے۔
