جیل میں عمران خان ،بشریٰ بی بی کا ماہانہ خرچ7لاکھ تک پہنچ گیا
راولپنڈی کے اڈیالہ جیل میں قید بانی پی ٹی آئی عمران خان اور اہلیہ بشریٰ بی بی کے اخراجات میں اضافہ،7لاکھ ماہانہ تک پہنچ گیا۔
ذرائع کا کہنا ہے کہ عمران خان اور بشریٰ بی بی کے کھانے اور دیگرضروریات پرماہانہ 7لاکھ روپے خرچ ہورہے ہیں۔بانی پی ٹی آئی عمران خان کا جیل میں ماہانہ خرچ 4 سے 5 لاکھ روپے تھا جب کہ اہلیہ بشریٰ بی بی کے جیل میں آنے سے اخراجات میں 2 لاکھ روپے کا اضافہ ہوا، عمران خان کا خاندان کھانے سمیت دیگر اخراجات برداشت کررہا ہے۔
ذرائع نے مزید تفصیلات بتاتے ہوئے کہا کہ سابق وزیراعظم عمران خان ناشتہ، دوپہر اور رات کھانے کا منیو خود سیٹ کرتے ہیں جب کہ عمران خان اور بشری بی بی کا کھانا الگ کچن میں مشقتی تیار کرتے ہیں۔
بانی پی ٹی آئی عمران خان ناشتے میں فریش جوسز اور پھل کھانا پسند کرتے ہیں جب کہ دن میں 3 مرتبہ کافی پیتےہیں اورتیاری کے بعد کھانا نیوٹریشنٹس چیک کرتے ہیں۔عمران خان پنک سالمن جب کہ دیسی مرغ کی یخنی کا بھی استعمال کرتے ہیں۔
ذرائع نے بتایا کہ جیل میں بانی پی ٹی آئی عمران خان اور بشری بی بی کا مینوئل اکاؤنٹ ہے، اکاونٹ میں رقم عمران خان کی فیملی جمع کراتی ہے جب کہ اکاؤنٹ میں پیسے کم ہونے پر فیملی کو آگاہ کردیا جاتا ہے۔
