طورخم سرحد 20 روز بعد افغان شہریوں کی واپسی کے لیے کھول دی گئی
طورخم سرحدی گزرگاہ 20 روز بعد غیر قانونی طور پر مقیم افغان شہریوں کی واپسی کے لیے کھول دی گئی۔ سینکڑوں افغان پناہ گزین اپنے وطن واپسی کے لیے طورخم سرحد پر پہنچ گئے، تاہم تجارت اور پیدل آمدورفت بدستور معطل ہے۔
ضلع خیبر کے ڈپٹی کمشنر بلال شاہد کے مطابق سرحد کو صرف غیر قانونی افغان شہریوں کی بے دخلی کے مقصد کے لیے کھولا گیا ہے۔ انہوں نے بتایا کہ درجنوں خاندان طورخم امیگریشن سینٹر پہنچ چکے ہیں جہاں امیگریشن عملہ ضروری کارروائی مکمل کرنے کے بعد انہیں افغانستان جانے کی اجازت دے رہا ہے۔
انہوں نے مزید کہا کہ سرحدی گزرگاہ تجارت اور عام آمدورفت کے لیے تاحکمِ ثانی بند رہے گی۔
یاد رہے کہ 11 اکتوبر کو پاک–افغان کشیدگی کے باعث طورخم سرحد ہر قسم کی آمدورفت کے لیے بند کر دی گئی تھی، جس کے نتیجے میں دوطرفہ تجارت معطل ہونے سے تاجروں کو اربوں روپے کا نقصان برداشت کرنا پڑا۔
اقوامِ متحدہ کے ادارہ برائے پناہ گزین (یو این ایچ سی آر) کے ترجمان قیصر خان آفریدی کے مطابق 8 اکتوبر تک 6 لاکھ 15 ہزار غیر قانونی افغان شہریوں کو طورخم کے راستے ملک بدر کیا جا چکا ہے۔
