وزیراعظم کیوں نہیں بنے؟صحافیوں کی نوازشریف پرسوالات کی بوچھاڑ

وزیراعظم کیوں نہیں بنے؟صحافیوں کی سوالات کی بوچھاڑ پرنوازشریف نے کہاکہ  میری لندن سے امریکہ روانگی سے پہلے ایسا سوال ضروری ہے؟

نوازشریف امریکہ روانہ ہو گئے

مسلم لیگ (ن) کے صدر اور سابق وزیر اعظم نواز شریف لندن سے امریکا کے لیے روانہ ہوگئے۔

سابق وزیراعظم نے ایک روز لندن میں قیام کیا

 دبئی میں ایک روز قیام کے بعد نواز شریف گزشتہ روز ہی لندن پہنچے تھے جہاں ان کی رہائش گاہ ایون فیلڈ اپارٹمنٹ کے باہر کارکنوں نے اپنے لیڈر کا استقبال کیا تھا۔

 صحافیوں کے نوازشریف سے سوالات

لندن سے امریکا کے لیے روانگی کے وقت ایک صحافی نے سوال کیا کہ آپ کا دورہ امریکا نجی نوعیت کا ہے، ایک اور صحافی نے پوچھا میاں صاحب آپ وزیر اعظم کیوں نہیں بنے، ایک صحافی نے سوال کیا کہ گزشتہ سال 21 اکتوبر کو آپ چوتھی بار وزیراعظم بننے کے لیے پاکستان گئے تھے، عوام دیکھ رہے تھے کہ آپ وزیر اعظم بنیں گے، آپ وزیر اعظم کیوں نہیں بنے؟

 صدر ن لیگ کا صحافیوں کا جواب دینے سے انکار

ان سوالات کے جواب میں نواز شریف نے کوئی جواب دینے کے بجائے صحافی سے پوچھا کہ میری امریکا روانگی سے پہلے کیا یہ سوال پوچھنا ضروری ہے؟

ایون فیلڈ کے باہرلیگی،پی ٹی آئی کارکنوں کی نعرے بازی

یاد رہے کہ گزشتہ روز نواز شریف دبئی میں ایک روز قیام کے بعد لندن پہنچے تھے جہاں ان کی رہائش گاہ ایون فیلڈ اپارٹمنٹ کے باہر کارکنوں نے اپنے لیڈر کا استقبال کیا تھا جبکہ اس موقع پاکستان تحریک انصاف (پی ٹی آئی) کے کارکن بھی احتجاج کے لیے وہاں موجود تھے۔سابق وزیراعظم کی موجودگی میں تحریک انصاف اور مسلم لیگ (ن) کے کارکنوں کی ایک دوسرے کے خلاف نعرے بازی کی جبکہ حالات قابو میں رکھنے کے لیے لندن پولیس کی نفری بھی موجود رہی۔

لندن پہنچ کر بھی سابق وزیراعظم نے گفتگو نہیں کی

لندن پہنچنے کے بعد مسلم لیگ (ن) کے صدر میڈیا سے بات چیت کیے بغیر ہی اپنے گھر میں چلے گئے تھے۔

واضح رہے کہ نواز شریف 25 اکتوبر کو غیر ملکی ایئرلائن کی پرواز ای کے 625 کے ذریعے دبئی روانہ ہوئے تھے، ان کی روانگی کے موقع پر پارٹی ذرائع نے بتایا تھا کہ 29 اکتوبر کو لندن سے نواز شریف امریکا جائیں گے، جہاں وہ 4 روز رکنے کے بعد واپس لندن پہنچیں گے۔