پنجاب میں ووٹرز کی تعداد بڑھنے کی بجائے کم کیوں ہونے لگی؟

الیکشن کمیشن آف پاکستان کی تازہ ترین انتخابی فہرستوں کے مطابق صرف دو ماہ کے دوران ملک بھر میں رجسٹرڈ ووٹرز کی تعداد میں تقریباً 5 لاکھ 90 ہزار کی خالص کمی ریکارڈ کی گئی ہے۔ اگرچہ اس عرصے میں تقریباً 9 لاکھ نئے ووٹرز کا اندراج کیا گیا، تاہم 14 لاکھ 84 ہزار سے زائد فوت شدہ ووٹرز کے نام انتخابی فہرستوں سے خارج کیے جانے کے باعث مجموعی تعداد کم ہوگئی۔ پنجاب میں سب سے زیادہ کمی سامنے آئی، جبکہ الیکشن کمیشن کا کہنا ہے کہ نادرا کے ڈیٹا کی بنیاد پر انتخابی فہرستیں مسلسل اپ ڈیٹ کی جاتی ہیں تاکہ ووٹرز کا ریکارڈ شفاف اور درست رہے۔

الیکشن کمیشن آف پاکستان کے جاری کردہ تازہ اعدادوشمار کے مطابق 7 مئی سے 2 جولائی 2026 کے دوران ملک بھر میں رجسٹرڈ ووٹرز کی تعداد میں 5 لاکھ 89 ہزار 458 کی خالص کمی ریکارڈ کی گئی۔ اس کے بعد رجسٹرڈ ووٹرز کی مجموعی تعداد 13 کروڑ 71 لاکھ 63 ہزار 857 سے کم ہو کر 13 کروڑ 65 لاکھ 74 ہزار 399 رہ گئی۔

اعدادوشمار کے مطابق اس عرصے میں 8 لاکھ 94 ہزار 924 نئے اہل ووٹرز، جنہوں نے قومی شناختی کارڈ حاصل کیا، انتخابی فہرستوں میں شامل کیے گئے۔ دوسری جانب 14 لاکھ 84 ہزار 382 فوت شدہ ووٹرز کے نام انتخابی فہرستوں سے خارج کیے گئے، جس کے نتیجے میں مجموعی طور پر ووٹرز کی تعداد میں کمی سامنے آئی۔

صوبائی سطح پر جائزہ لیا جائے تو سب سے زیادہ کمی پنجاب میں ریکارڈ کی گئی، جہاں 4 لاکھ 78 ہزار 909 ووٹرز انتخابی فہرستوں سے کم ہوئے، جو مجموعی کمی کا تقریباً 81 فیصد بنتی ہے۔ سندھ میں 97 ہزار 216 ووٹرز کی کمی ریکارڈ کی گئی، جبکہ دیگر صوبوں میں بھی معمولی ردوبدل دیکھا گیا۔

اعدادوشمار سے یہ بھی ظاہر ہوتا ہے کہ مرد ووٹرز کی تعداد میں خواتین کے مقابلے میں زیادہ کمی آئی۔ اس عرصے کے دوران 4 لاکھ 50 ہزار 962 مرد ووٹرز جبکہ 1 لاکھ 38 ہزار 496 خواتین ووٹرز کی خالص کمی ریکارڈ کی گئی۔

الیکشن کمیشن کے مطابق انتخابی فہرستوں میں ڈپلیکیٹ ووٹرز کا امکان نہ ہونے کے برابر ہے کیونکہ ووٹر رجسٹریشن کا نظام نادرا کے کمپیوٹرائزڈ قومی شناختی کارڈ سے منسلک ہے۔ ہر شہری صرف ایک شناختی کارڈ پر ایک ہی ووٹ رجسٹر کروا سکتا ہے، جبکہ رہائش یا انتخابی حلقہ تبدیل ہونے کی صورت میں پرانی رجسٹریشن خودکار طور پر ختم ہو جاتی ہے اور نئی جگہ اندراج کر دیا جاتا ہے۔

الیکشن ایکٹ 2017 کے سیکشن 25 کے تحت انتخابی فہرستیں مسلسل نادرا سے موصول ہونے والے ڈیٹا کی بنیاد پر اپ ڈیٹ کی جاتی ہیں۔ اس عمل میں نئے اہل ووٹرز کا اندراج، ووٹرز کے کوائف میں تبدیلی اور وفات پانے والے افراد کے ناموں کا اخراج شامل ہوتا ہے تاکہ انتخابی فہرستیں ہر وقت درست اور شفاف رہیں۔

اعدادوشمار کے مطابق 9 مارچ 2026 کو ملک میں رجسٹرڈ ووٹرز کی تعداد 13 کروڑ 65 لاکھ 66 ہزار 594 تھی، جو 7 مئی تک بڑھ کر 13 کروڑ 71 لاکھ 63 ہزار 857 ہو گئی تھی۔ اس عرصے میں تقریباً 5 لاکھ 97 ہزار ووٹرز کا اضافہ ہوا، تاہم بعد کے دو ماہ میں فوت شدہ ووٹرز کے نام خارج ہونے اور فہرستوں کی مسلسل اپ ڈیٹ کے نتیجے میں تقریباً اتنی ہی کمی ریکارڈ کی گئی۔ یوں 2 جولائی 2026 تک رجسٹرڈ ووٹرز کی تعداد مارچ کے مقابلے میں صرف 7 ہزار 805 زیادہ رہی۔