ویمنزورلڈ کپ، بارش کے باعث پاک انگلینڈمیچ نتیجےکےبغیرختم،1،1پوائنٹ مل گیا
آئی سی سی ویمنز ورلڈ کپ میں پاکستان اور انگلینڈ کے مابین میچ بارش سے متاثر ہونے کے بعد کسی نتیجے کے بغیر ختم کردیا گیا۔دونوں ٹیموں کو1،1پوائنٹ مل گیا۔
انگلینڈ نے 25 اوورز کی بیٹنگ میں 7 وکٹوں کے نقصان پر79 رنز بنائے تھے کہ بارش کی وجہ سے کھیل روکناپڑا جس کے بعد میچ کو 31/31 اوورز تک محدود کردیا گیا تھا ۔انگلینڈ نے31 اوورز میں 9 وکٹوں پر133 رنز بنائے تھے۔
پاکستان کو ڈک ورتھ لوئس قانون کے تحت 31 اوورز میں 113 رنز کا نظرثانی شدہ ہدف ملا لیکن جب اس نے6 اعشاریہ 4 اوورز میں بغیر کسی نقصان کے 34 رنز بنائے تھے کہ دوبارہ بارش کی وجہ سے کھیل روک دینا پڑا ۔
انگلینڈ کیخلاف میچ میں پاکستان کی کپتان فاطمہ ثنا کی شاندار بولنگ تھی۔
پریماداسا سٹیڈیم میں کپتان فاطمہ ثنا نے ٹاس جیت کر انگلینڈ کو بیٹنگ دی ۔
انگلینڈ کی ٹیم ایک موقع پرصرف 57 رنز پر6 وکٹوں سے محروم ہوچکی تھی جس کا سبب فاطمہ ثنا کی شاندار بولنگ تھی جنہوں نے 15گیندوں پر ایمی جونز۔ کپتان نیٹ سیور برنٹ اور ہیدر نائٹ کی وکٹیں حاصل کرڈالی تھیں۔ دوسری جانب سے ڈیانا بیگ نے ٹیمی بیمونٹ کو آؤٹ کردیا تھا۔
سپنر سعدیہ اقبال نے سوفیا ڈنکلی اور ایما لیمب کی وکٹیں حاصل کیں تو میچ پر پاکستان ٹیم کی گرفت مضبوط ہوچکی تھی۔
پاکستان کو ساتویں وکٹ 78 کے مجموعی سکور پر ملی جب رامین شمیم نے 16 رنز بنانے والی ایلس کیپسی کو ایل بی ڈبلیو کردیا۔
بارش رکنے کے بعد جب کھیل دوبارہ شروع ہوا تو انگلینڈ نے اپنے سکور79 رنز 7 کھلاڑی آؤٹ میں مزید 54رنز کا اضافہ کیا اور اس دوران اس کی دو وکٹیں گریں۔چارلی ڈین 33 رنز کے ساتھ ٹاپ سکورر رہیں۔
فاطمہ ثنا نے صرف 27 رنز دے کر 4 وکٹیں حاصل کیں۔سعدیہ اقبال نے 2 کھلاڑیوں کو 16 رنز کے عوض آؤٹ کیا۔
پاکستان کی اننگز میں منیبہ علی اور عمیمہ سہیل نے 34 رنز کا پراعتماد آغاز فراہم کیا ۔منیبہ علی نے ایک چوکے کی مدد سے 9 رنز بنائے ۔ عمیمہ سہیل نے 19 رنز سکور کیے جس میں 4 چوکے شامل تھے۔پاکستان ٹیم اپنا پانچواں میچ 18 اکتوبر کو نیوزی لینڈ کے خلاف کھیلے گی۔
