اداکارہ سدرہ نیازی سوشل میڈیا صارفین پر کیوں برس پڑیں؟

معروف اداکارہ سدرہ نیازی نے انکشاف کیا ہے کہ نجی زندگی کو سوشل میڈیا پر لانے کیخلاف ہوں، ہمیں اپنی زندگیاں سب کے سامنے کھول کر رکھنی پڑ رہی ہیں، آپ مجھ پر تنقید کر سکتے ہیں لیکن میری فیملی آپ کی انٹرٹینمنٹ کیلئے نہیں۔سدرہ نیازی نے سوشل میڈیا پر انفلوئنسرز اور ولاگرز کی جانب سے نجی زندگی سے متعلق مواد شیئر کرنے پر اپنی رائے کا اظہار کرتے ہوئے کہا کہ وہ اس کے خلاف ہیں، حال ہی میں سدرہ نیازی نے اداکار سہیل سمیر کے ہمراہ پروگرام گپ شپ میں شرکت کی جہاں انہوں نے سوشل میڈیا پر مواد بنانے کیلئے فیملی اور نجی زندگی شیئر کرنے پر اختلاف کرتے ہوئے اپنی رائے کا اظہار کیا۔قبل ازیں اداکار فہد مصطفیٰ نے ٹک ٹاکرز پر شدید تنقید کرتے ہوئے کہا تھا کہ مواد کے نام پر ہر کوئی اپنی فیملی بیچ رہا ہے، سوشل میڈیا پر ولاگرز اور انفلوئنسرز انٹرنیٹ پر صبح، دوپہر، شام کچن اور گھر کی باتیں شئیر کر رہے ہوتے ہیں، لوگ قبرستان تک بھی نہیں چھوڑتے، یہ کون سا مواد ہے؟پروگرام کے میزبان واسع چوہدری نے پہلے اداکار سہیل سمیر سے جب سوشل میڈیا استعمال کرنے سے متعلق پوچھا تو انہوں نے بتایا کہ وہ سوشل میڈیا زیادہ استعمال نہیں کرتے، آج کل کے دور میں سوشل میڈیا پر ایکٹو رہنا ضرورت بن گیا ہے، میں بھی ایکٹو رہنے کی کوشش کرتا ہوں لیکن مجھے تھوڑا مشکل لگتا ہے کہ میں اپنی روزانہ کی مصروفیت سوشل میڈیا پر شیئر کروں، سب کو سب بتانا ضروری نہیں ہے۔اداکارہ سدرہ نیازی نے سہیل سمیر کی بات سے اتفاق کرتے ہوئے کہا کہ فہد مصطفیٰ نے بالکل ٹھیک کہا تھا کہ مواد کے نام پر ہمیں اپنی زندگیاں سب کے سامنے کھول کر رکھنی پڑ رہی ہیں۔ یہ انتہائی دکھ کی بات ہے اور ایسا کرنے پر ہمیں نتائج کا بھی سامنا کرنا پڑتا ہے۔اداکارہ نے کہا کہ میں اپنی زندگی کی مصروفیات بالکل شیئر نہیں کرتی، مجھ سے جتنا ممکن ہوتا ہے اپنے متعلق بنیادی اپڈیٹس مداحوں تک ضرور شیئر کرتی ہوں، آپ میرے کام کے بارے میں بات کر سکتے ہیں، مجھ پر تنقید کر سکتے ہیں لیکن میری فیملی آپ کی انٹرٹینمنٹ کیلئے نہیں ہے۔سوشل میڈیا پر فیملی کے نام پر مواد شیئر کرنے پر سدرہ نیازی نے کہا کہ اداکاروں کے علاوہ انفلوئنسرز، بلاگرز کی بڑی تعداد اس کام کیلئے تیار ہے کہ انہوں نے کیا کھایا، کیا پکایا، کہاں گئے، کس سے ملاقات کی، گھر پر کیا ہوا، کیا خوشی منائی، وہ کس موڈ میں ہیں، ایسے لوگ اپنی زندگی کے بارے میں ہر چیز سوشل میڈیا پر بتاتے ہیں اور یہ کام شوق سے کرتے ہیں۔