حسنی مبارک شدید علالت کے بعد پہلی بار منظرعام پر

تین دہائیوں تک مصر پر حکمرانی کرنے والے سابق صدر حسنی مبارک کے پوتے عمرعلاء مبارک نے کچھ دن قبل پیچیدہ سرجری کے عمل سے گزرنے والے اپنے دادا کی تازہ تصویر شائع کی ہے۔معدے کی سرجری کے بعد حسنی مبارک کی پہلی تصویر ہے جس میں انہیں اپنے پوتے کے ہمراہ دیکھا جا سکتا ہے۔ عمر علاء مبارک نے انسٹا گرام کے اکاؤنٹ سے یہ تصویر جاری کی ہے اور ساتھ ہی حسنی مبارک کےلیے اپنی محبت بھرے جذبات کا بھی اظہارکیا گیا ہے۔
سابق مصری صدر حسنی مبارک کے اہل خانہ کے قریبی ذریعے نے بتایا کہ حسنی مبارک کے معدے میں تکلیف کے بعد ان کی سرجری کی گئی تاہم اب وہ بہتر ہیں۔ انہیں دو ہفتے قبل قاہرہ میں المعادی ملٹری اسپتال میں علاج کے لیے داخل کیا گیا تھا۔ خاندانی ذرائع کا کہنا ہے کہ حسنی مبارک تیزی سے روبہ صحت ہیں تاہم وہ چند روز تک اسپتال میں ہی رہیں گے، اس کے بعد انہیں گھر بھیج دیا جائےگا۔
خیال رہے کہ حسنی مبارک گزشتہ برس یکم اکتوبر کو برطرفی کے 9 سال بعد یوٹیوب پر منظرعام پرآئے تھے۔ انہوں جنگ اکتوبر 1973ء کے حوالے سے بات کرتے اور جنگ کی یادیں دہراتے سنا جاسکتا ہے۔ حسنی مبارک کو 26 دسمبر 2018ء کو مصر کی ایک فوجی عدالت میں پیشی کے موقعے پربھی دیکھا گیا تھا۔92 سالہ حسنی مبارک 1928ء کو پیدا ہوئے اور 1981ء سے گیارہ فروری 2011ء تک 30 سال مصر کے صدر رہے۔