شارٹ فال پوراکرنےکیلئےآئی ایم ایف کی اضافی ٹیکس کی تجویز

آئی ایم ایف نے ٹیکس کاشارٹ فال پورا کرنے کیلئےاضافی ٹیکس کی تجویز دےدی۔

ذرائع کے مطابق پاکستان اور عالمی مالیاتی فنڈکے درمیان دوسرے ششماہی اقتصادی جائزہ مذاکرات کے دوران ادارے نے خدشہ ظاہر کیا کہ علاقائی کشیدگی میں اضافہ معیشت کے لیے خطرہ بن سکتا ہے۔

آئی ایم ایف کی رپورٹ کے مطابق کشیدگی میں اضافے سے اجناس کی قیمتوں میں اضافہ اور شرح نمو میں سست روی پیدا ہوسکتی ہے جبکہ عالمی سطح پر غیریقینی حالات بھی غیرملکی سرمایہ کاروں کے اعتماد کو متاثر کر سکتے ہیں۔

ذرائع کا کہنا ہے کہ آئی ایم ایف نے بتایا کہ رواں مالی سال کی پہلی سہ ماہی میں 200 ارب روپے کا ٹیکس شارٹ فال ریکارڈ کیا گیا، جسے پورا کرنے کے لیے اضافی ٹیکس عائد کرنے کی تجویز دی گئی ہے۔

ذرائع ایف بی آر کے مطابق آئی ایم ایف نے کھاد پر ایکسائز ڈیوٹی 5 سے بڑھا کر 10 فیصد کرنے اور زرعی کیڑے مار ادویات پر 5 فیصد نئی ڈیوٹی لگانے کا مطالبہ کیا ہے۔

تاہم حکومتِ پاکستان نے حالیہ تباہ کن سیلاب کے اثرات کے پیش نظر ایک سال کی مہلت مانگ لی ہے۔