ایشیائی ترقیاتی بینک رپورٹ ، پاکستان میں مہنگائی 6 فیصد تک پہنچنے کا امکان
ایشیائی ترقیاتی بینک (ADB) نے "ایشین ڈیولپمنٹ آؤٹ لک” رپورٹ جاری کر دی ہے، جس میں پاکستان کی معیشت کے حوالے سے درمیانی مدت کے امکانات کو مثبت قرار دیا گیا ہے۔
رپورٹ میں بتایا گیا ہے کہ پاکستان کی معیشت مالی سال 2026 تک ترقی کی راہ پر گامزن رہے گی، اور جی ڈی پی گروتھ 3 فیصد تک رہنے کا امکان ہے۔ پالیسی اصلاحات اور مالیاتی استحکام معیشت کی بہتری میں اہم کردار ادا کریں گے۔
اے ڈی بی کی رپورٹ کے مطابق سال 2026 میں مہنگائی 6 فیصد تک پہنچنے کی توقع ہے، جس کی بنیادی وجوہات میں گیس ٹیرف میں اضافہ شامل ہے۔ مرکزی بینک مہنگائی پر قابو پانے کے لیے محتاط مانیٹری پالیسی پر عمل کرے گا۔
رپورٹ میں مزید کہا گیا ہے کہ آئی ایم ایف پروگرام کے تحت پاکستان میں معاشی اصلاحات میں نمایاں پیش رفت ہوئی ہے۔ اگرچہ ترقی کے امکانات روشن ہیں، مگر ساختی (structural) چیلنجز بدستور موجود ہیں۔
تعمیراتی شعبے کے لیے بجٹ میں دی گئی مراعات سے محدود ریلیف حاصل ہوگا، تاہم یہ نقصان کی شدت کو کسی حد تک کم کر سکتے ہیں۔
اے ڈی بی نے خبردار کیا ہے کہ قدرتی آفات، بالخصوص حالیہ سیلاب، ترقی کی راہ میں بڑی رکاوٹ بن سکتے ہیں۔ سیلاب سے انفراسٹرکچر اور زرعی اراضی کو نقصان پہنچا ہے، جو نہ صرف شرح نمو پر دباؤ ڈالے گا بلکہ سپلائی چین کے متاثر ہونے سے خوراک کی قیمتوں میں اضافہ بھی متوقع ہے۔
رپورٹ میں یہ بھی کہا گیا ہے کہ اگر اصلاحات پر عملدرآمد جاری رہا تو معیشت کی رفتار اور کاروباری اعتماد بحال رکھا جا سکتا ہے۔ مزید یہ کہ مالی سال 2026 میں امریکا کے ساتھ متوقع تجارتی معاہدے سے سرمایہ کاری میں بہتری اور زرمبادلہ کے ذخائر میں اضافہ متوقع ہے۔
