پاکستان کے ساتھ تعلقات نئی بلندیوں پرجائیں گے،چینی وزیرخارجہ
چین کے وزیر خارجہ وانگ ژی نے کہا ہے چین پاکستان کو اپنا قابل اعتماد اتحادی تصور کرتا ہے۔ پاک چین تعلقات نئی بلندیوں کی جانب بڑھ رہے ہیں۔
اسلام آباد میں وزیر خارجہ اسحاق ڈار سے ملاقات کے دوران وانگ ژی نے کہا کہ دونوں ممالک کو کثیرالجہتی تجارتی نظام کے تحفظ کے لیے مل کر کام کرنا چاہیے۔ انہوں نے کہا کہ چین سی پیک کے دوسرے مرحلے کو اپ گریڈ کرنے اور پاکستان کے ساتھ صنعتی، زرعی، کان کُنی اور سائبر سکیورٹی کے شعبوں میں تعاون بڑھانے کا خواہشمند ہے۔
چینی وزیر خارجہ کا کہنا تھا کہ چین پاکستان کے علاقائی اتحاد اور دہشت گردی کے خلاف جنگ میں حمایت جاری رکھے گا اور امید ہے کہ پاکستان محفوظ اور سازگار کاروباری ماحول قائم رکھنے کا سلسلہ جاری رکھے گا۔
ملاقات کے بعد مشترکہ پریس کانفرنس میں وانگ ژی نے کہا کہ چین اور پاکستان کے درمیان اسٹریٹجک شراکت داری مزید مستحکم ہو رہی ہے۔ انہوں نے وزیراعظم شہباز شریف کے آئندہ دورۂ چین کا بھی خیرمقدم کیا۔
نائب وزیراعظم و وزیر خارجہ اسحاق ڈار نے کہا کہ چین کے ساتھ ملاقات انتہائی مفید رہی، جس میں سی پیک فیز ٹو سمیت تمام اہم پہلوؤں کا تفصیلی جائزہ لیا گیا۔ انہوں نے کہا کہ پاکستان کی سالمیت اور خودمختاری کے تحفظ کے لیے چین کے عزم کو سراہتے ہیں اور خطے کے امن و خوشحالی کے لیے مل کر کام کرنے کے لیے پرعزم ہیں۔
اسحاق ڈار نے مزید کہا کہ عوامی سطح پر روابط، دوطرفہ تعاون اور بین الاقوامی فورمز پر ایک دوسرے کی حمایت کو مزید فروغ دیا جائے گا۔
