سعودی وفد کی مریم نوازسےملاقات،سرمایہ کاری کاعندیہ دیدیا
وزیراعلیٰ پنجاب مریم نواز سے سعودی شہزادہ منصور بن محمد کی زیرقیادت پاک سعودی جوائنٹ بزنس کونسل کی ملاقات،پنجاب میں سرمایہ کاری کاعندیہ دیدیا۔
پاک سعودی جوائنٹ بزنس کونسل کے وفد کے اعزاز میں تقریب سے اظہار خیال کرتے ہوئے مریم نواز کا کہنا تھا میں نے اپنی جلاوطنی کے دنوں میں جدہ میں کئی سال گزارے، میں کہہ سکتی ہوں کہ جدہ کو بھی اتنا ہی جانتی ہوں جتنا لاہور کو جانتی ہوں۔
وزیراعلیٰ پنجاب مریم نواز کا کہنا ہے مکہ اور مدینہ ہمیں اپنی جان سے بھی زیادہ عزیز ہیں، مقدس مقامات کی پاسبانی کی میزبانی پاکستان کے لیے اعزاز کی بات ہے۔
وزیراعلیٰ پنجاب مریم نواز کا کہنا تھا پاکستان اور سعودی عرب کے برادرانہ تعلقات پوری مسلم دنیا کیلئے مثالی ہیں، سعودی عرب پوری مسلم امہ کیلئے ایک مثالی حیثیت رکھتا ہے، سعودی عرب اور پاکستان کے درمیان دفاعی معاہدے کو عوام نے بے پناہ سراہا۔
ان کا کہنا تھا پنجاب حکومت جدید خطوط پر کام کررہی ہے، خادم الحرمین شریفین کے ساتھ پاکستان کے تعلقات کو نئی جہت لے جائیں گے، سرمایہ کاروں کو بہترین سہولتیں فراہم کر رہے ہیں، پاکستان پر اعتماد کرنے پر سعودی قیادت کی شکر گزار ہوں۔
سعودی شہزادہ منصور بن محمد کا اس موقع پر کہنا تھا پنجاب میں سرمایہ کاری کیلئے پُرعزم ہیں، سعودی عرب اور پاکستان کے درمیان نئے دور کا آغاز ہو چکا ہے، سعودی سرمایہ کاروں کو بہت پہلے پاکستان آنا چاہیے تھا۔
انہوں نے کہا کہ پنجاب کی زمینیں زرخیز ہیں، پنجاب کے ساتھ شراکت داری بہت اہمیت کی حامل ہے، پنجاب ہماری سرمایہ کاری کیلیے بہت اہم ہے، پنجاب میں موجود سرمایہ کاری کے مواقعوں سے فائدہ اٹھائیں گے۔
