طلبہ جلاؤگھیراؤکرنے والوں کا ایندھن نہ بنیں،مریم نواز
وزیراعلیٰ پنجاب مریم نواز کاکہنا ہے کہ طلبہ کسی جلاؤگھیراؤکرنے والوں کا ایندھن نہ بنیں نہ کسی کے بہکاوے میں آئیں۔اگر یہ بات اچھی ہوتی تو کسی کے بچے معافی مانگ کر باہر نہ آتے۔
ملتان میں یونیورسٹی کے طلبہ سے خطاب کرتے ہوئے مریم نواز نے کہا کہ میں چاہتی ہوں اچھی تعلیم کے ساتھ ساتھ طالبات معاشی طورپربھی با اختیارہوں، بہت سارے ٹریننگ پروگرام شروع کیے ہیں جس میں بہت مثبت رجحان ہے، طالبات کو 3کروڑ روپےتک کا قرضہ ملےگاتاکہ آپ اسٹارٹ اپس شروع کرسکیں۔
مریم نواز نے اسکالرشپس پر بات کرتے ہوئے کہاکہ میرا شکریہ اداکرنے کی ضرورت نہیں، 100فیصد میرٹ پر طلبہ کو اسکالرشپس ملی ہیں، یہ اسکالرشپس جو دی جارہی ہیں یہ میرا پیسہ نہیں، آپ کا پیسہ ہے۔
وزیراعلیٰ پنجاب نےمزید کہا کہ جن گھروں کی سالانہ انکم 3لاکھ سے کم ہےان کیلئے تعلیمی اخراجات اٹھانا آسان نہیں، تمام 30 ہزار کی 30 ہزار اسکالرشپ میرٹ پر دی گئی ہیں، اس سال 30 ہزار اسکالرشپ دے رہے ہیں،کوشش ہےکہ 50 ہزار اسکالرشپ دی جائیں۔
وزیراعلیٰ پنجاب نے کہا کہ سیاسی فلسفہ رکھنا کوئی بری بات نہیں لیکن لوگوں کی عزت کرنا، انہی اقدار کے ساتھ معاشرے اور ملک کی پہچان ہوتی ہے، مجھے نہیں پتا کہ قومی اخلاقیات کس جانب جارہی ہے؟
مریم نواز نے کہاکہ پاکستان کا مستقبل آپ کے ہاتھوں میں ہے، آپ ذمے داریوں کے ساتھ چلیں گے تو ملک کو ترقی سے کوئی نہیں روک سکتا۔
