وزن کم کرنیوالی ادویات نشے کی طلب کم کرنے میں مددگارقرار
وزن کم کرنے کے لیے استعمال ہونے والی معروف ادویات اوزیمپک اور ویگووی سے متعلق نئی سائنسی تحقیق نے ان کے ممکنہ فوائد کے ایک اور پہلو کی نشاندہی کی ہے۔
ماہرین کے مطابق یہ ادویات نہ صرف بھوک اور وزن کم کرنے میں مدد دیتی ہیں بلکہ الکوحل اور بعض دیگر نشہ آور اشیا کے استعمال کی خواہش بھی کم کر سکتی ہیں۔
ان ادویات کے استعمال سے کئی افراد میں نمایاں وزن کم ہونے کے اثرات دیکھے گئے ہیں۔ تاہم، سائنس دانوں کی توجہ اب دماغ کے ریوارڈ سسٹم پر ان کے ممکنہ اثرات کی جانب بھی بڑھ رہی ہے۔
ماہرین کے مطابق انسان جب کسی پسندیدہ غذا یا نشہ آور چیز کے بارے میں سوچتا ہے تو دماغ میں پیدا ہونے والی طلب اسے اس چیز کے حصول اور استعمال کی جانب راغب کرتی ہے۔ یہی نظام ضرورت سے زیادہ فعال ہو جائے تو موٹاپے، الکوحل کے غلط استعمال اور دیگر نشوں جیسے مسائل پیدا ہو سکتے ہیں۔
