کراچی: گیس کی قلت پر فردوس شمیم نقوی عمران خان پر برس پڑے

سندھ اسمبلی میں پاکستان حزب اختلاف اور پاکستان تحریک انصاف کے رہنما فردوس شمیم نقوی نے گیس بحران کے معاملے پر اپنے ہی وزیراعظم اور وفاقی حکومت کو کڑی تنقید کا نشانہ بنا ڈالا۔
فردوس شمیم نقوی نے کراچی میں گیس بحران پر گزشتہ روز سوئی سدرن گیس کمپنی کے دفتر کے باہر احتجاج کیا اور پاکستان تحریک انصاف کی وفاقی حکومت ہی برس پڑے۔ سوئی سدرن گیس کمپنی کے دفتر کے باہر میڈیا سے بات چیت کرتے ہوئے فردوس شمیم نقوی نے کہا کہ پاکستان میں چاہے حکومت ن لیگ کی ہو یا تحریک انصاف کی، اس شہرمیں گیس کی ڈیلیوری کبھی درست نہیں ہو سکی۔ فردوس شمیم نقوی کا کہنا تھا کہ مجھے اس سے کوئی سروکار نہیں کہ کس کی حکومت ہے، لیکن مجھے یہ پتہ ہے کہ کراچی کے شہریوں کو گیس نہیں مل رہی۔ ان کا کہنا تھا کہ ن لیگ کی حکومت ہو یا تحریک انصاف کی لیکن کراچی میں گیس کا مسئلہ حل نہیں ہوا، دو سال ہوگئے کراچی میں گیس کا مسئلہ جوں کا توں ہے۔
سندھ اسمبلی میں اپوزیشن لیڈر کا کہنا تھا کہ میں اس مسئلے پر شور مچاؤں گا اور شرم بھی دلاؤں گا، وزیر اعظم صاحب بھی سنیں، وزیر توانائی عمر ایوب بھی سنیں اور ندیم بابر بھی سنیں، میں شور بھی مچاؤں گا اور انھیں شرم بھی دلاؤں گا۔ تاہم اب فردوس شمیم نقوی نے اپنے گزشتہ روز کے بیان پر معذرت کرلی ہے۔ سوشل میڈیا پر جاری اپنے بیان میں فردوس شمیم نقوی نے لکھا کہ میں تمام انصافیوں سے معافی مانگنا چاہتا ہوں۔ ان کا یہ بھی کہنا تھا میرا ارادہ تھا کہ میں وزیراعظم سے وزیر توانائی اور ایس ایس جی سی کے بارے میں شکایت کروں۔
فردوس شمیم نقوی کا کہنا تھا کہ اپنے لیڈر سے بھی معذرت چاہتا ہوں، جو کہ انتہائی پرعزم شخصیت ہیں۔

I would like to apologise to all INSAFIANS
My intention was to say I am going to complain about the energy minister and SSGC to the PM On hearing the recording words are not exactly conveying that.
My apologies to my leader. Who is the most committed & upright man I have met.

— Firdous Shamim Naqvi (@Fsnaqvi) September 18, 2020