چھاتی کے سرطان سے آگاہی مہم، قومی ٹیم پہلے ٹی 20 میں گلابی کٹ پہنے گی

پاکستان کرکٹ ٹیم چھاتی کے سرطان سے آگاہی مہم کے سلسلے میں جنوبی افریقا کےخلاف پہلے ٹی 20 میں گلابی کٹ پہنے گی۔

پاکستان کرکٹ بورڈ نے چھاتی کے سرطان سے متعلق آگاہی کےلیے پنک ربن مہم میں شمولیت اختیار کی ہے، پی سی بی  کے چیف آپریٹنگ آفیسر سمیر احمد سید کا کہنا تھا کہ راولپنڈی میں کھیلےجانے والے پہلے ٹی ٹوئنٹی کے دوران جنوبی افریقی ٹیم اور میچ آفیشلز گلابی ربن پہنیں گے۔

سی او او پی سی بی سمیر احمد نے کہاکہ پاکستان ٹیم پہلا ٹی ٹوئنٹی گلابی تھیم والی خصوصی کٹ پہن کر کھیلےگی جب کہ اس روز میچ میں استعمال ہونے والی اسٹمپس بھی گلابی رنگ کی ہوں گی۔

سمیر احمد نے کہاکہ کرکٹ کے ذریعے چھاتی کے سرطان سے متعلق عوامی آگاہی پھیلانا پی سی بی کی ہمیشہ سے کوشش رہی ہے،دوران میچ کمنٹیٹرز براہ راست نشریات میں آگاہی پیغامات شیئر کریں گے۔

یاد رہے کہ پاکستان اور جنوبی افریقا کےدرمیان ٹی ٹوئنٹی سیریز 28 اکتوبر سے یکم نومبر تک کھیلی جائےگی۔