جنوبی افریقا ٹیم کے دورہ پاکستان کو VVIP سکیورٹی دینے کا فیصلہ
وفاقی حکومت نے جنوبی افریقا کی کرکٹ ٹیم کے مجوزہ دورہ پاکستان کو وی وی آئی پی سکیورٹی سٹیٹس دینے کی منظوری دے دی ہے۔
وزارتِ داخلہ کی جانب سے اس فیصلے سے متعلق ایک مراسلہ جاری کیا گیا ہے، جو اسلام آباد انتظامیہ، پنجاب ہوم ڈیپارٹمنٹ، پنجاب رینجرز، اور لاہور و راولپنڈی پولیس کو ارسال کیا گیا ہے۔
مراسلے کے مطابق، وزیراعظم نے کابینہ ڈویژن کی سفارش پر جنوبی افریقی ٹیم کے دورہ پاکستان کو وی وی آئی پی سکیورٹی فراہم کرنے کی اجازت دی، تاکہ کسی بھی ممکنہ ناخوشگوار واقعے سے بچاؤ کو یقینی بنایا جا سکے۔
وفاقی حکومت نے تمام متعلقہ قانون نافذ کرنے والے اداروں کو ہدایت دی ہے کہ اس ہائی پروفائل کرکٹ سیریز کے دوران فول پروف سکیورٹی انتظامات کو ہر صورت یقینی بنایا جائے۔
یاد رہے کہ جنوبی افریقا کی ٹیم کا دورہ پاکستان 7 اکتوبر سے 9 نومبر 2025 تک شیڈول ہے۔
