بھارتی فلم انڈسٹری میں کیریئر بنانے کا ارادہ نہیں،دلجیت

 معروف پنجابی گلوکار و اداکار دلجیت دوسانجھ نے کہا کے کہ ان کا بھارتی فلم انڈسٹری، خاص طور پر بالی ووڈ میں کیریئر بنانے کا کوئی ارادہ نہیں۔

سوشل میڈیا پر وائرل ایک پرانے انٹرویو کلپ میں دلجیت کو یہ کہتے ہوئے سنا جا سکتا ہے کہ "مجھے بالی ووڈ میں سپر اسٹار بننے کی کوئی خواہش نہیں، میں پنجاب سے ہوں، جہاں لوگ خود گانے بناتے اور گاتے ہیں، ہمیں کسی سٹار کی ضرورت نہیں ہوتی۔”

گلوکار نےمزید کہا کہ وہ جب تک چاہیں گلوکاری کرتے رہیں گے، اور بالی ووڈ میں کام نہ ملنے پر انہیں کوئی پریشانی نہیں۔

یہ ویڈیو ایسے وقت میں وائرل ہوئی ہے جب دلجیت دوسانجھ کو بھارت میں تنقید کا سامنا ہے، کیونکہ انہوں نے اپنی نئی فلم "سردار جی 3” میں پاکستانی اداکارہ ہانیہ عامر کے ساتھ کام کیا ہے۔ اگرچہ یہ انٹرویو ماضی کا ہے، لیکن اس کا تناظر حالیہ تنازعے سے جوڑ کر دیکھا جا رہا ہے۔

دوسری جانب، پاکستانی شائقین دلجیت اور ہانیہ کی جوڑی کو پسند کر رہے ہیں اور فلم میں ان کی پرفارمنس کو سراہا جا رہا ہے۔